Кызылдың Ада-чурттуң Маадырлары аттыг 20 дугаар школага Ада-чурт камгалакчызының чылынга тураскааткан «Погоннуг кыстар» деп республика чергелиг шериг-спортчу оюн бир дугаар болуп эрткен. Бүгү-российжи уруглар болгаш аныяктарның «Юнармия» деп шериг-патриотчу шимчээшкининиң регионалдыг салбыры оюнну организастаан.
Маргылдаага 56 киржикчиден тургустунган 14 аныяк армейжилер командалары киришкен. Кызылдың 1 дугаар школазының, Тываның кадет корпузунуң, Кызылдың президентиниң кадет училищезиниң командалары оларның аразынче кирген. Кызыл, Каа-Хем, Бии-Хем, Таңды, Тес-Хем, Улуг-Хем, Чаа-Хөл, Чеди-Хөл кожууннарның командалары тиилелге дээш демисешкен. Ыраккы Мөңгүн-Тайга, Тожу дээн ышкаш кожууннар база киришкен.
Шериг-спортчу оюнга киржикчилер элээн каш мөөрейлерни эрткен. Командалар маргылдаа үезинде демниг чоруун, күш-дамыр белеткелин, чурттуң төөгүзүн эки билирин көргүскеннер. Тускай шериг операциязының амгы шериг албанныглары болгаш хоочуннары, ол ышкаш «Тываның маадырлары» регионалдыг төлевилелдиң тиилекчилери командаларның оюннарын шииткен.
«Погоннуг кыстар» деп шериг-патриотчу оюнга киришкенимге дыка өөрдүм. Өөреникчилерниң угаан-медерел болгаш чогаадыкчы сайзыралында бот-тускайлаң хереглелдерин бүгү талазы-биле ажыдып, хөгжүдер, патриотчу сагыш-сеткилди, хамааты харыысалганы, шажын-чүдүлгеге хамаарылгазын, шериг хүлээлгезинге хей-аътты база белеткелди оттурар сорулга-биле оюнну эрттирген» - деп, «Тываның маадырлары» төлевилелдиң тиилекчизи, гвардияның улуг сержантызы Айлана Биче-оол демдеглээн.
Оон аңгыда маргылдааның киржикчилери кончуг эки белеткенип, шупту чадаларга шыырак үре-түңнелдерни көргүскенин демдеглээн. Ынчалза-даа шериг албанынга күш-шыдал белеткели онза рольду ойнаан. Бо талазы-биле Кызылдың президентиниң кадет училищезинден өөреникчилер тергиин күш-шыдал белеткелин көргүзүп, шылгараан деп, тускай шериг операциязының киржикчизи бодунуң бодалын илереткен.
Кызыл кожууннуң Каа-Хемниң 2 дугаар школазының уруглар командазы маргылдааның шупту чадаларынга тиилээн. Тываның кадет корпузунуң кыстары ийиги черни ээлээн болза, Мөңгүн-Тайга кожууннуң Мугур-Аксының 1 дугаар школазы биле Кызылдың президентиниң кадет училищези үшкү черни үлешкеннер.