2025 чылдың ноябрь 18-тен 23-ке чедир Каспийск хоорайга, Соңгу Кавказка профессионалдар аразынга кикбоксингиге бир дугаар делегей чемпиону Али Порсуковтуң чырык адынга тураскааткан Россияның эр болгаш херээжен спортчулар аразынга кикбоксинг маргылдаазы болуп эрткен. Маргылдаа чурттуң 59 регионнарындан 651 спортчуну хаара туткан. Маргылдааның киржикчилери «фулл-контакт», «К-1», «лоу-кик», «поинтфайтинг», «лайт-контакт» база «чаңгыстың композициялары» хевирлерге күжүн шенээн.
Чемпионатка Тыва Республиканы 11 кикбоксер, бир судья, ийи тренер төлээлеп киришкеш, бедик деңнелдиг белеткелин көргүзүп, лоу-кик хевирге командалыг сан-биле үшкү черни ээлээннер. Тыва спортчулар хууда 2 алдын, 3 мөңгүн, 1 хүлер медальдарны чаалап алганнар. «Олимп» олимпийжи курлавыр спорт школазының болгаш Ак-Довурак хоорайның, Улуг-Хем кожууннуң спорт школаларының кижизиттирикчилери шаңналдарлыг черлерже кирген.
60 килге Россияның беш дакпыр чемпиону Төрепчи Донгак база 52 килге чемпион Сайлык Салчак республикага онза шаңналды чаалап эккелгеннер. Херел Хандарма Россияның спорт мастери атты күүседип, 54 кил деңзиге база Ховалыг Дугана 70 кил деңзиге маргылдааның лоу-кик хевиринге мөңгүн медальдарны чаалап алганнар. «Олар кайызы-даа 2026 чылда Колумбияга болуп эртер делегей чемпионадынга чурттуң алдар-адын камгалап киржир» - деп, Тыва Республиканың кикбоксингиге улуг тренери Алибек Монгуш чугаалаан.
Багай-оол Кежик К-1 хевирниң 54 кил деңзизинге мөңгүн медальды чаалап алган болза, Шолбана Балчый лоу-кик хевирниң 52 кил деңзизинге хүлер медальды чаалап алганнар.