Тыва Республиканың «Күрүнениң юридиктиг бюрозу» (Тыва Республиканың Күрюрбюрозу) 2025 чылдың тос айларында ажыл-чорудулгазының дугайында илеткеп, ында халас эрге-хоойлу ачы-дузазы улгатканын база чонну хаара тудары көвүдээнин дыңнаткан. Тыва Республиканың Баштыңы Владислав Ховалыгның шиитпири-биле 2022 чылдың декабрьда тургустунган албан чери республиканың социал деткимчеге хереглелдиг хамаатыларга халас эрге-хоойлу камгалалын хандырар кол рольду ойнап турар.
Күрүнениң юридиктиг бюрозу халас юридиктиг ачы-дуза дугайында федералдыг болгаш регионалдыг хоойлужудулгаларга даянып, эвээш орулгалыг хамаатыларга, I болгаш II бөлүктүң инвалидтеринге, хары угда көөрү болгаш дыңнаары багай III бөлүктүң инвалид кижилеринге, тускай шериг операциязының киржикчилеринге болгаш оларның өг-бүле кежигүннеринге, дайынчы хөделиишкиннер хоочуннарынга, өскүс уругларга болгаш өскелерге-даа ачы-дузаны көргүзер.
Күрүнениң эрге-хоойлу албан чериниң кол сорулгазы — эрге-хоойлу тайылбырларын бээри (аас болгаш бижимел), юридиктиг документилерни (билдириишкиннер, хомудалдар, дилег бижиктер) тургузары, судтарга, күрүне болгаш муниципалдыг органнарга хамаатыларның чамдык бөлүктериниң сонуургалдарын төлээлээри.
Отчеттуг үе дургузунда Күрүнениң юрбюро специалистери хамаатыларның 4567 айтырыгларын сайгарган. Оларның хөй кезии, азы 2752-зи — аас-биле ачы-дуза чедирилгези болган. Оон аңгыда, 1081 юридиктиг документини тургускан, оларның аразында 159 билдириишкиннер, 43 хомудалдар болгаш 532 удурланыышкыннар бар.
Күрүнениң юрбюрозу республиканың чурттакчы бүрүзүнге чурттап турар чери азы арга-шыдалындан хамаанчокка, эрге-хоойлу дузазын чедирер дээш идепкейлиг ажылдап турар. 2025 чылдың тос айында муниципалдыг тургузугларже 44 үнүүшкүннү кылган, аңаа 244 хамааты дузаны алган. Баш бурунгаар киирген чагыглар-биле шимчевес улустуң бажыңнарынче үнүүшкүннерни организастап турар, тос ай иштинде 18 ындыг ажылды чоруткан.
Күрүнениң юрбюро специалистери Тыва Республиканың Дыңнавас улус ниитилели болгаш Инвалидтер ниитилелинче, «Ада-чурт камгалакчылары» фондунуң салбырынче, Кызылдың Өг-бүлеге болгаш уругларга социал дуза төвүнче дээш, аңгы-аңгы хөй-ниити организацияларынче доктаамал барып турар. Ол үнүүшкүннер үезинде 38 кижиге дузаны көргүскен.
Күрүнениң юрбюрозу байырлалдар үезинде эрге-хоойлу консультацияларын организастап турарын демдеглезе чогуур, ындыг хемчеглер үезинде 110 кижи дузаны алган.
Амгы үениң технологияларын ажыглалче кииргени - ачы-дуза чедирилгезиниң аргаларын көвүдеткен. Күрүнениң эрге-хоойлу бюрозу 2024 чылдың март 20-ден эгелеп видеоконференцхарылзаа (Яндекс-телекөвүрүг) дамчыштыр ырактан консультацияларны берип эгелээн. 2025 чылдың тос айында 16 ындыг консультацияны чоруткан. Ол ышкаш телефон дамчыштыр янзы-бүрү айтырыгларга 106 бирги юридиктиг арга-сүмелерни берген.
Тыва Республиканың Күрүнениң юрбюрозу 2025 чылдың февральдан тура чугула бир төлевилелди эгелээн – шефте алганы Свердловск муниципалдыг районнуң чурттакчыларынга онлайн-консультацияларны берип турар, беш кижи чугула хереглээни юридиктиг деткимчени алган.
Күрүнениң юрбюро специалистери консультациялардан аңгыда, хуу кижилерниң сонуургалдарын судка төлээлеп турар. Отчеттуг үе дургузунда специалистер аңгы-аңгы эрге-хоойлу айтырыгларын хаара туткан: өскүс уругларны (8 таварылга) база инвалид кижилерни (3 таварылга) чурттаар оран-сава-биле хандырарындан эгелээш, хамааты кижини өлген деп санаары, алимент тырттырары, садыглажылганы күш чок болдурары база юридиктиг фактыларны тодарадырынга чедир шупту 19 херекке киришкен.