2025 чылдың ноябрь 26-да, ТР-ның Национал театрынга, Россияның аңгы-аңгы регионнарындан болгаш даштыкы чурттардан хөй санныг аалчыларның киржилгези-биле Тыва Республиканың чаа соңгуттурган Х-гу Камба-Ламазының дүжүлгезинге олурар езулал планнаттынган. Байырлыг езулалды Тыва 24 телеканалдың vk.com/tvtyva деп арынынга дорт онлайн дамчыдар.
2025 чылдың октябрь 4-те Тыва Республиканың Камба-Ламазының сөөлгү соңгулдалары болуп эрткен. Республиканың сарыг шажын лама башкыларының бадылаашкыны-биле республиканың буддистериниң чүдүлге баштыңы кылдыр Гелонг Лоден Шераб, анаа ады Долаан Александрович Уржанай соңгуткан. Ол Индияның Дрепунг Гоманг хүрээзинге буддийжи философияның долу он алды чыл өөредилгезин дооскан.
Кызылда Тубтен Шедруб Линг буддийжи хүрээде чоокта чаа ажыттынган Россияның буддийжи университединиң ректору кылдыр Гелонг Лоден Шерабты томуйлаан.
Чаа соңгуттурган Камбы-Ламаны Тываның шажын чүдүлге баштыңы кылдыр томуйлаарының езулалын буддийжи езу-дүрүмге дүүштүр эрттирип, чогуур чурумнарны сагып чорударын Тыва Республиканың Камбы-Лама эргелели дыңнаткан.
Чаа Камбы-Лама езулал үезинде, регионнуң шажынчы амыдыралында чаа чаданың эгелээнин илереткен ыдыктыг даңгыракты бээр.
Дүжүлгеже олурар ёзулалдың эң чугула болгаш ханы уткалыг кезээ – буян чыылдазының күштүг демдээ, материалдыг чүүлдерден артык сүлде-сүзүктүң мурнады хөгжүлдезин болгаш буддийжи Өөредиглерни сагып чоруурун илереткен мандаланы өргүүр.
Дүжүлгеже олурар езулалда мөргүлдерни номчуур, а хүндүлүг аалчыларның киржилгези-биле хемчегниң албан езузунуң кезээ дүъште эгелээр.
Тайылбыр: Хелиң – сарыг шажында лама башкыларның дээди өөредиин четкени.