Улусчу фронтунуң «Бүгү чүүлдү Тиилелге дээш» деп акциязы-биле, дайынчыларга чаа чыл бүдүүзүнде чедирер кылдыр планнаан кышкы гуманитарлыг чүък чыылдазы Тыва Республиканың Чазааның деткиишкини-биле республикада эгелээн. Бо үеде доңурган эът шериглерге эң-не үнелиг чүък болуру билдингир. Кожууннарның малчыннары эътти үүжелеп эгелээн.
Дайынчыларның дилээ-биле техниктиг дериг-херекселдери база тыпкан. Бо удаада Тывадан материалдыг дузаламчыны Луганск, Донецк, Запорожье, Херсон уунче чорудар.
Чыылда пунткузун организастаан Улусчу фронтунуң регионалдыг күүсекчи комитеди 20 тоннаның чүък база эът чүдүрер соодукчулуг машиналарны чорудар планныын дыңнаткан. Генераторлар, чылыдар пушкалар, рациялар, дроннар болгаш өске-даа техниктиг дериг-херекселдер - дайынчыларның эң-не улуг дилээ болуп арткан.
Бии-Хем кожууннуң Тарлаг суурдан малчын Айбек Монгуш - дуза көргүскеннерниң баштайгызы. Ол бир ирт биле бир бода эъдин шериглерже дамчыткан. «Чаңгыс чер чурттуглары тускай шериг операциязында дайынчыларывысты деткип турарын эскерип көрзүн база тиилелгелиг чанып келзиннер дээш, ачы-буян дузазын эгезинден эгелеп чедирип турар бис» - деп, малчын чугаалаан.
Республиканың шупту булуңнарындан сагыш човаачал кижилер ниити херекке боттарының үлүүн киирип турарлар: волонтерлар камгалал четкилерни аргып, чылыг идик-хепти даарап, аъш-чем аймаан, эм-таңны, хууда арыг-силигниң херекселдерин чыып турар. Ажылчын организациялар дайынчыларның дилээ-биле техниктиг дериг-херекселдерни чорударынга белеткээн.
Улуг-Хем кожууннуң Хайыракан суурдан волонтерлар снайперлерге чаштыр четкилерни өрүп турар. Волонтер Елена Түлүштүң чугаазы-биле алырга, суурнуң идепкейжилери шериглеривиске 270 ажыг чаштыр четкилерни дамчыдып берген.
Тес-Хем кожуунда «Дыттыг-Хем» волонтерлар отряды база «Чаңгыс демниг Россияның херээженнер шимчээшкини» партийжи төлевилелдиң идепкейжилери «Маадырга чылыг» деп эгелээшкин езугаар чылыг чеңи-чоктарны даарап, чаштыр четкилерни өрүп турар.
Чаа-Хөл кожуунда Контроль-саналга палатазының ажылдакчылары чылыг уктарны, а «Чаа-Хөлдүң чалгыглары» шимчээшкинден кожууннуң хоочуннары бирги эмчи дузазы чедирер эмнерни болгаш шарыыр материалдарны белеткээн.
Гуманитарлыг дузаламчы дамчыдар дизе, дараазында адресте Улусчу фронтунуң регионалдыг күүсекчи комитединге баар: Тыва эки турачылар кудумчузу, 3 дугаар бажың (Норзин садыг төвү) азы Ленин кудумчузунда 5 дугаар бажыңда «Бис кады бис» деп волонтер штавы. Харылзажыр телефону: +7 (39422) 2-10-50.