Бүдүн Россияда ышкаш, Тыва ноябрь 20-де, Транспорт ажылдакчыларының хүнүн демдеглеп турар. Республиканың Баштыңы Владислав Ховалыг транспорт адырында ажылдап чоруур чаңгыс чер чурттугларынга профессионал байырлалы-биле байырны чедирген.
«Бүгү экономиказы болгаш шупту амыдыралы автомобиль сөөртүлгезинден хамааржыр Тывага бо дээрге чоннуң байырлалы-дыр. Республика чурттакчы чонунуң чартыы хирези транспортту башкарар, ону септээр база ооң-биле холбаалыг бүгү-ле ажыл-чорудулганы чорудуп турар» - деп, байыр чедириишкининде демдеглээн.
Транспорт ажылдакчыларының ачызында өске-даа адырлар кадагалаттынып, хөгжүп турарын республика баштыңы айыткан. Транспорт адыры боду улуг чаартылганы болгаш катап тургузуушкунну эртип турар. Чоокка чедир-ле хуу сайгарлыкчылар найысылалда болгаш кожууннар төптериниң аразында аргыжылганы коммерциялыг үндезинге тудуп турган болза, ам доктаамал халдыыр автобус маршруттары катап тургустунган. Улуг инвестиция төлевилелдерин боттандырарынга, республиканың өске регионнар-биле үзүктел чок аргыжылгазын хандырарынга, амыдыралга чугула барааннарны Тываже сөөртүп чедиреринге транспорт ажылдакчылары улуг рольду ойнап турар.
«Транспорт адырында ажылдап чоруур кижи бүрүзүнге, ооң хоочуннарынга төрээн чериниң болгаш бүгү чаңгыс чер-чурттугларының чаагай чоруу дээш профессионал мергежили, ажылынга бердингени, ак сеткилдиг күш-ажылы дээш сеткиливис ханызындан өөрүп четтиргенивисти бүгү республиканың өмүнээзинден илередип тур бис. Кадыкшылды, ажылынга чедиишкиннерни болгаш ам-даа хөгжүлдени күзедивис» - деп, ында бижээн.