Тыва Республиканың Чазааның Даргазының оралакчызының хүлээлгезин күүседип турар Айдыс Сынааның удуртулгазы-биле эки турачы улусчу дружиналарның ажыл-чорудулгазын дүүштүрер республика штавының хуралы Тыва Республиканың Чазаанга болуп эрткен. Бо чылдың 10 айларында хөй-ниити корум-чурумун тударынга хамаатыларның киржилгезин организастаар ажылды сайгарып көрген соонда, 198 эң-не идепкейлиг дружинниктерни база кызыгаар кожууннардан 13 кижини шаңнаар дугайында шиитпир хүлээп алдынган. Тываның Баштыңы Владислав Ховалыг хөй-ниити корум-чурумун тударынга эки турачы улусчу дружиналар кежигүннериниң улуг үлүг-хуузун демдеглээн.
Республиканың эки турачы улусчу дружиналарының ажыл-чорудулгазын дүүштүрер штабтың дыңнатканы-биле алырга, регионалдыг реестрде 2126 кежигүннерлиг 122 дружина бүрүткеттинген.
Республика Баштыңы бодунуң албан езузунуң блогунда, чылдың эгезинден бээр улусчу дружиналар улуг хемчээлдиг ажылдарны кылганын дыңнаткан: «Бо чылдың сөөлгү 10 айында дружинниктер 26 кем-херектерни ажыдарынга дузалажып, 92 административтиг корум-чурум хажыдыышкыннарын болдурбаан. Хоойлуга удур арага садып-саарары-биле демиселче онза кичээнгейни угландырган. Улусчу дружинниктер 90 «адрестерни» база 323 садыгларны хынаан».
Эки турачы улусчу дружиналар одуруу доктаамал немежип турарын Владислав Ховалыг дыңнаткан. Бо чылын Чеди-Хөл кожууннуң чурттакчылыг суурларында хөй-ниити чурумун тударынга дузалажыры-биле «Чал-Кежиг» биле «Хартыга» деп ийи чаа дружина тургустунган. Тыва Республиканың ИХЯ-зынче эки турачы дружиналарже кирер күзелдиг кижилерден 319 билдириишкин кирген. Хыналдалар соонда, 251 кижини регионалдыг реестрже киирген.
Тыва Республиканың Чазаа дружинниктерни озал-ондактардан камгаладырынга акша-хөреңгини чылдың-на тускайлап турар. Бо чылын 2451 кижини камгалаттырган. «Хөй-ниитиниң корум-чурумун хандырары болгаш кем-херек үүлгедиинге удур демисел» күрүне программазы-биле регионалдыг реестрже кирген дружинниктерни шаңнап-мактаарынга база оларның ажылынга херек бүгү-ле чүүлдерни садып алырынга акша-хөреңгини тускайлаан.
Бир эвес эки турачы дружинник муниципалдыг тургузугда хөй-ниити чурумун камгалаарынга болгаш быжыглаарынга үлүг-хуузун киирип, сөөлгү чылда дежурствоже 24-тен эвээш эвес үнгени дээш мактаткан болза, дружина командириниң дилээнге даянып, муниципалдыг эки турачы улусчу дружинниктер штавы ону хандырар дугайында шиитпирни үндүрүп, эки турачы дружинниктерге материалдыг деткимчени көргүзер.
Кызыл база Ак-Довурак хоорайлардан, Бай-Тайга, Барыын-Хемчик, Чөөн-Хемчик, Каа-Хем, Кызыл, Мөңгүн-Тайга, Сүт-Хөл, Тере-Хөл, Тожу, Улуг-Хем, Чаа-Хөл, Эрзин, Тес-Хем, Таңды база Чеди-Хөл кожууннардан эки турачы улусчу дружиналар кежигүннерин шаңнал-макталче сүмелеп киирген.