Күстүң төнчү айының сөөлгү улуг-хүнүнде, Россияда Иелер хүнүн демдеглээри чаңчыл апарган. Россияның Президентиниң чарлыы-биле 1998 чылда доктааттынган ол хүннү бо чылын ноябрь 30-де байырлаар. «Херээжен чонга камныг хамаарылганың ужур-чаңчылдарын деткип, өг-бүлениң үнелиг чүүлдерин быжыглаары» - байырлалдың ужур-утказы деп албан езунуң документизинде быжыглаан.
Россияның өске регионнарында ышкаш Тывага база Иелер хүнүнге тураскааткан хөй санныг хемчеглер эртер. Школаларда, чаштар садтарында уруглар бир-ле чүүлдерни чогааткаш холу-биле кылып, портреттерни чуруп, аваларга байыр чедириишкиннерин белеткеп эгелээн. Ноябрь 13-тен эгелеп, республиканың хоорайлар болгаш суурларында культура бажыңнарынга болгаш төптеринге 120 ажыг культура-массалыг хемчеглер планнаттынган. Программада – “төгерик столдар”, концерттер болгаш мини-концерттер, театрыжыткан көргүзүглер, өөредилгелиг болгаш чогаадыкчы мастер-класстар, викториналар болгаш беседалар, уран номчулга мөөрейлери, литературлуг-хөгжүм кежээлери болгаш өске-даа хемчеглер бар.
Чижээлээрге, Кызыл кожууннуң Ээрбек суурда көдээ культура бажыңы тус черниң чурттакчыларынга «Авалар-2025» деп агитбригадалар мөөрейин эрттирер. Каа-Хем кожууннуң Дерзиг-Аксы суурда культура бажыңы база Барыын-Хемчик кожууннуң Бижиктиг-Хая суурда көдээ клуб үлегерлиг болгаш хөй ажы-төлдүг иелерни алдаржыдар. Аксы-Барлык суурнуң көдээ Культура бажыңы сумунуң херээжен чонунга шыва тонну даарап өөредир мастер-класс эрттирер. А Чадаанада Мерген-Херел Монгуш аттыг кожууннуң Культура бажыңында бөлгүмнер болгаш клубтар каттыжыышкыннары «Авага белек» деп байырлал концертин көргүзер.
Тывага Иелер хүнүнге тураскааткан республиканың кол хемчеглерин адаанда парладывыс.
Ниитилел болгаш социал угланыышкынныг хемчеглерНоябрь 24-30 – Тыва Республиканың Перинаталдыг төвүнден база божудулга салбырларындан чаштарны байырлыг байдалга үндүр бижиири (ХБАБ-тың девискээр органнары).
Ноябрь 24-30 – дун төл божаан аваларга байырлыг байдалга херечилелдерин тыпсыры (ХБАБ-тың девискээр органнары).
Ноябрь 26-27 – Аваларга «Аваның хей-ады» социал-психологтуг тренинг («Сайзырал» РПМСАТ КБУ-нуң конференц-залы).
Ноябрь 8 – «Тылдың ишчилери - фронтуга» форум (Улусчу чогаадылга бажыңы).
Ноябрь 29 – Ажык эжиктер хүнү. Божуп-төрүүр кадыкшылды камгалаар талазы-биле консультация (Тыва Республиканың Перинаталдыг төвү, Республиканың хөй-ниити кадыкшылының болгаш эмчи профилактиказының төвү, төп кожуун эмнелгелери, кожууннар аразының эмнелге төвү).
Ноябрь 28-29 – «Уругну эки кижизидериниң үндезини өг-бүле хамаарылгада» өг-бүле консультацияларының хүннери (Тыва Республиканың Перинаталдыг төвү, Республиканың хөй-ниити кадыкшылының болгаш эмчи профилактиказының төвү, төп кожуун эмнелгелери, кожууннар аразының эмнелге төвү).
Ноябрь 25-ке чедир – Тыва Республиканың Херээженнер эвилелиниң «Ие кижи - хүн» төлевилели-биле амыдыралдың берге байдалынга таварышкан иелер киришкен Хамааты идепкей школазы («Деткимче» республика төвү).
Культура-дыштанылга хемчеглери
Ноябрь 17-28 – Ие хүнүнге тураскааткан шүлүктер болгаш комикстер мөөрейи (Тыва Республиканың өөредилге черлери).
Ноябрь 27 – «Ие болгаш чаш: харылзааның өөрүшкүзү» номнар делгелгези (А.С. Пушкин аттыг ТР-ниң Национал библиотеказы).
Ноябрь 27 – декабрь 15 - «Чүректиң ханызындан» деп делгелге (QR-кодтар-биле) (К.И. Чуковский аттыг республиканың уруглар библиотеказы).
Ноябрь 27 – «Ава – амыдыралдың эгези…» оюннар программазы (К.И. Чуковский аттыг республиканың уруглар библиотеказы).
Ноябрь 28 – ТШО солдаттарының иелери болгаш кадайлары-биле хөгжүмнүг ужуражылга-кежээ (А.С. Пушкин аттыг ТР-ниң Национал библиотека).
Ноябрь 30 – «Кадын - 2025» деп иелер ортузунга республика мөөрейи (Улусчу чогаадылга бажыңы).
Спортчу хемчеглер
Ноябрь 29 – «Авам-биле кады» спартакиада (И. Ярыгин аттыг СК).
Онлайн-хевирге хемчеглер
Ноябрь 27 – Тыва АССР-ниң Маадыр иелерниң дугайында үндүрүлгелер (Национал музейниң албан езунуң сайтызы база «Тувинская правда» солунда).
Ноябрь 28 – «Ажылдап турар аваларга ажыктыг сүмелер» вебинар (https ://vk.com/sayzyra12001).
Ноябрь 20 – «Тываның алдарлыг кыстары» интернет-делгелге (ВКонтакте социал четкиде Национал архивтиң арыны).
Ноябрь 29 – «Арганың сымыраныы» деп шииниң онлайн-көргүзүү (ВКонтакте социал четкиде күрүнениң ойнаар-кыстар театрының арыны).
Информастыг-чырыдыышкын хемчеглери
Ноябрь 24-30 – уругнуң кижизидилгезинге иениң ролюнуң дугайында иштиг херээженнерге лекциялар (ХБАБ-тың девискээр органнары).
Ноябрь 27 – Келир үениң иелеринге кадыкшыл школазы (Республиканың хөй-ниити кадыкшылының болгаш эмчи профилактиказының төвү, Тыва Республиканың Перинаталдыг төвү).