Тываның Баштыңы Владислав Ховалыг «Сорунза» губернатор төлевилели-биле Бай-Тайга кожууннуң Ээр-Хавак сумузунга туттунган 120 олуттуг чаа культура бажыңы удавас ажыттынарын дыңнаткан. 2021 чылдан боттанып эгелээн төлевилел эргижирээн көдээ культура бажыңнарының санын эвээжедир сорулгалыг. Республикада губернатор төлевилели боттанып эгелээнден бээр ол арга-биле 16 чаа культура бажыңнарын туткан.
«Бай-Тайганың Ээр-Хавак сумузунда библиотекалыг, 120 олуттуг чаа культура бажыңы бо чоокку хонуктарда ажыттынар. Кожууннуң чону чогаадыкчы салым-чаяаны-биле шагда-ла сурагжаан, ынчангаш чаа культура бажыңы оларның талантызын ажыдарынга болгаш эң-не дидим бодалдарын боттандырарынга езулуг шөл апаарынга бүзүрээр мен» - деп, Владислав Ховалыг чаа клуб ажыдыышкынын дыңнаткан.
Культура бажыңының тудуг төлевилелиниң негелдези езугаар тудуг материалдарын, эт-септи болгаш дериг-херекселдер садарынче республика бюджединден акша-хөреңгини тускайлаан болза, техниктиг негелделерлиг чөпшээрел документилерин, транспорт чарыгдалдарын болгаш өске-даа чүүлдерни тус чер бюджединден кады акшаландырар.Тус черниң чурттакчыларының киржилгези база көдээ суму чагыргазының удуртулгазы-биле улусчу тудуг туттунуп турар.
Губернатор төлевилелинге киржилге суурларга чаа культура одагларын тудар азы бар черлерни чаартыр арганы берип турар. Суур чурттакчыларының чаңгыс демнии база харыысалгалыы, ол ышкаш төрээн черинде амыдыралды экижидер күзели ону чедип алыр ужурлуг.
Губернатор төлевилели-биле 2025 чылда Бай-Тайга кожууннуң Найырал база Улуг-Хем кожууннуң Торгалыг суурларда ийи культура бажыңнары туттунуп турар. Ол ийи объектиде тудуг ажылдары доозулгалак.
Чаа культура бажыңнары культура ачы-дузазының шынарын бедидер болгаш культура-массалыг хемчеглерге киржикчилерниң санын көвүдедир ужурлуг. Көдээ чурттакчылыг черлерге культура бажыңының шөлүн улгаттырары, ооң баазазынга бөлгүмнер болгаш библиотекаларны ажыдып тургаш, чоннуң дыштанылгазын элээн экижидер деп, Тываның Культура яамызы дыңнаткан.