Тывада аныяктарның культурлуг идепкейин деткип, оларны культурлуг хемчеглерже хаара тудар сорулгалыг «Пушкин картазы» программа эки хөгжүп турар. Бо хүнде республикада 118 культура албан черлери ол программа-биле ажылдап турар. Оларың санында музейлер, театрлар, концерт коллективтери, муниципалдыг культура төптери болгаш клубтар, библиотекалар, уругларның уран чүүл школалары, кинотеатрлар, чогаадыкчы төптер бар.
Тываның Культура яамызының дыңнатканы болза, бо чылдың тос айларында республикага 500 хире хемчег эрткен, ынаар 22726 билеттерни Пушкин картазы-биле саткан. Билеттер садып алырынга чарыгдаан акшшаның ниити түңү 16 миллион ажыг рубль болган. Республиканың культура албан черлери хемчеглерниң көвей кезии - 302 хемчегни эрттирген болза, муниципалдыг культура организациялары 195 хемчеглерни организастаанын демдеглээри чугула.
Бир хемчегни программаже кииртир дизе, ол Эксперт чөвүлелиниң хыналдазын эртер ужурлуг. Чөвүлелдиң составында культура адырындан, аныяктар политиказындан, Тыва Республиканың ИХЯ-дан төлээлер, психолог башкы кирип турар. Чөвүлел чыл эгезинден бээр программага киржир дугайында 761 билдириишкинни сайгарып көрген.
Регионнуң Культура яамызы «Пушкин картазы» программаже шупту культура албан черлерин киирер дээш ажылдап турар. «Найырал» кинотеатры биле И.Г. Сафьянов аттыг орус культура төвүн, ол ышкаш көдээ аныяктарның культурлуг амыдыралынга чугула черни ээлеп турар көдээ культура бажыңнарын ынаар киирери – мурнады боттандырар угланыышкын.
«Пушкин картазы» - бүдүн чуртта культурлуг хемчеглеринже билеттерни бир чыл дургузунда садып ап болур 5000 рубль акша шыгжамырлыг банк картазы дээрзин сагындыраал. Карта-биле 14 хардан 22 харга чедир студентилер картаны ажыглаар эргелиг. Ону күрүне ачы-дузаларының порталы таварыштыр билдириишкин кииргеш, халас кылдырып ап болур.