Тускай шериг операциязындан халашкан республиканың шериг албанныгларга болгаш оларның өг-бүлелеринге боттарының ажыл-агыйын ажыдарынга деткимче көргүзер угланыышкынныг «СВОй бизнес: албан-хүлээлгеден бодунуң ажыл-херээнче» деп өөредилге курузу доозулган. Он беш киржикчи сайгарлыкчы чорукту эгелээринге практиктиг арга-мергежилдерни шиңгээдип алганын бадыткаан сертификаттарны алган.
Тываның Чазааның болгаш регионнуң Экономиктиг сайзырал база үлетпүр яамызының ТР-ниң Сайгарлыкчы чорукту деткиир фондузу база «Россияның деткимчези» регионалдыг салбыр-биле кады ажылдап кылган программазы дыңнакчыларга комплекстиг билиглерни берген. Өөредилге үезинде киржикчилер “хостуг” ажыл-херектерни шилиириниң болгаш тургузарының үндезиннерин, тускай бөлүктер-биле чедимчелиг садыглажырының болгаш ажылдаарының, саң-хөө планнаашкынын болгаш чарыгдалдарын башкарарының, ол ышкаш ажылче хүлээп алырының болгаш команда тургузарының принциптерин шиңгээткеннер. Күрүнениң деткимче хемчеглеринче, грант программаларынга документилерни белеткээринче, эң-не таарымчалыг үндүрүг системазын шилип алырынче онза кичээнгейни угландырган.
Курстуң практиктиг угланыышкыны дыңнакчыларга шын бизнес-кейстерни сайгарып, бот-тускайлаң хөгжүлде карталарын тургузуп, баштайгы төлевилелдерин белеткээр арганы берген. Түңнел хыналда оларның алган билиглерин быжыглаарынга дузалаан. Келир үеде ажыл-чорудулганың айтып каан угланыышкыннарының аразында хууда камгалал компаниялары, чараштаныр адырда төлевилелдер, массаж ачы-дузалары болгаш хөй-ниитиниң чемненилге черлери бар.
«Тываның маадырлары» регионалдыг кадрлар төлевилелиниң киржикчизи Вадим Кара-оол – өөредилге хемчээниң киржикчилериниң бирээзи. Вадим Андреевичиниң дагдыныкчызы – Тываның экономиктиг сайзырал болгаш үлетпүр сайыды Аяс Санааевич Баян. Төлевилел негелделери-биле дүүштүр Вадим Кара-оол сайгарлыкчы чорукту деткиир фондуда стажировканы эртип, аңаа өөредилгени эрткен дугайында бадыткалды алган.
«Алган билиглеривис биске, дыңнакчыларга дыка ажыктыг болду. Лекторларның бистиң-биле үлешкен билиглерин болгаш арга-дуржулгазын шиңгээдип алганывыска бүзүрээр мен. Бүгү медээлерни чедимчелиг болгаш бөдүүн, билдингир дылга тайылбырлап бергеннер. Шак-ла мындыг өөредилге санал-оналдарывысты шын тургузарынга дузалап, улаштыр бизнести ажыдырарынга амгы сайгарлыкчылар-биле дорт сүмележип болур арганы биске берген. Бодумнуң сайгарлыкчы үзел-бодалымны ам-даа сайзырадыры чугула деп чүвени билип алдым. Байдалдарны аңгы-аңгы талаларындан көрүп билири чугула. Ниитизи-биле өөредилге дыка солун болду» - деп, Вадим Кара-оол бодунуң бодалдары-биле үлешкен.
Программаның баштайгы түңнелдери көстүп келген: доозукчуларның бирээзи бодунуң сайгарлыкчы ажылын бүрүткедип алгаш, банкет залын ажыдып, бодунуң бирги байырлалын эрттиреринге белеткенип эгелээн.
Ам бир чугула базым киржикчилерниң мурнунда: арга-дуржулгалыг сайгарлыкчыларның өөредиин алыры. Дагдыныкчылар бизнес-идеяларны чедир ажылдажып, эксперттиң көрүжүнден үнелелди берип, боттарының төлевилелдерин эгелээринге дузалажып, чедиишкинче орукту улаштыр деткиирин хандырарынга дузаны көргүзер.