Тываның Баштыңы Бии-Хем кожуунга ажыл-агыйжы сургакчылаашкын үезинде, кожуунда ажылдап чурттап чоруур тускай шериг операциязының хоочуннары-биле ужурашкан. Олар боттарының амыдырал-чуртталгазының, келир үеже планнарының дугайында чугаалап, төрээн кожуунун хөгжүдүп сайзырадырынга хамаарыштыр бодалдары-биле үлешкеннер. Владислав Ховалыг оларның эгелээшкиннерин деткиир күзелин илереткен.Владислав Ховалыг республиканың кожууннарынче үнген санында-ла ТШО киржикчилери болгаш оларның өг-бүлелери-биле ужуражыр чаңчылдыг. Бо удаада чеди ажы-төлдүг ада Сылдыс Ховалыг база балыгланган соонда инвалид апарган Буян Адышаа-биле ужурашкан.
«Ылаңгыя Туранда чеди ажы-төлүн чаңгыс боду кижизидип чоруур Сылдыс Ховалыгның төөгүзү мени хөлзетти. Уруглары өөредилгезинге база спортка тергииннер. Оларны бичиизинден тура-ла чурумга болгаш өскелерни хүндүлээр чорукка кижизидип чоруур. Буян Адышаа дайынга балыглангаш, ийиги бөлүктүң инвалиди болган. Аңаа чалынмайн, ол ам суурунуң амыдыралынга идепкейлиг киржип, мурнуку одуругда дайынчыларга дузалажып, гуманитарлыг ачы-дуза чыылдазынга бодунуң үлүүн доктаамал киирип, дайынчыларның өг-бүлелерин деткиирин оралдажып чоруур кижи болду» - деп, Тываның Баштыңы ооң-биле ужурашкан бодалдары-биле үлешкен.
Ужуражылганың киржикчилери кожууннуң амыдыралында эки өскерлиишкиннерни, ылаңгыя Аржаан суурже чаа орукту демдеглээннер. Аржаан, Хадың, Тарлаг база Чкаловка суурларның чурттакчыларынга асфальт-бетоннуг автоорук тудуу республикада суурлар болгаш өске-даа чурттакчылыг черлер аразынга транспорт харылзаазын бүзүрелдиг хандырыптар улуг ужур-дузалыг.
Тускай шериг операциязының хоочуннары чаа орук көдээ инфраструктураның болгаш сайгарлыкчы чоруктуң хөгжүлдезинге идиглиг болурун демдеглээннер.
Оон аңгыда, «Агромотиватор» дээн ышкаш төлевилелдеринге киржир айтырыглар Баштың-биле ужуражылганың киржикчилерин сонуургаткан. Эр улус көдээ ажыл-агыйны хөгжүдер бо төлевилелге киржир күзелин илереткеннер.
Россияның Президентизиниң даалгазы-биле ТШО киржикчилерин деткиир дээш тургускан «Агромотиватор» программа 2025 чылда ажылдап эгелээнин Владислав Ховалыг сагындырган.
Программаның негелдези езугаар эң эки бизнес төлевилелдерни киирген киржикчилерге эът болгаш сүт продукциязын бүдүреринге мыйыстыг бода мал өстүрүп-тударынга, ол ышкаш АҮК-түң өске-даа угланыышкыннарында бизнес ажыдарынга грантыларны бээр.
Албан-хүлээлгезин дооскан ийи ТШО киржикчизи: Кызыл кожууннуң Кур-Чер суурдан Александр Ондар база Улуг-Хем кожууннуң Шагаан-Арыг хоорайдан Лопсан Орус-оол бо чылын конкурс шилилдезин эрткеш, грантыларны алганнар.
Тываның Баштыңы ужуражылга соонда, төрээн кожуунунуң хөгжүлдези дээш көдээ ажыл-агыйы-биле туттунар күзелдиг тускай шериг операциязының хоочуннарын деткиирин бодунуң блогунда бижээн.