Тываның Баштыңы Владислав Ховалыг Бии-Хем кожуунга ажылчын сургакчылаашкын үезинде, 2024 чылда «Культура» национал төлевилели-биле кылдынган Өөк суурда культура бажыңының капитал септелгезиниң түңнелдерин көрген. Ол ышкаш «Күш-культура болгаш массалыг спортту хөгжүдери» деп федералдыг программа езугаар туттунуп турар ангар хевирлиг спорт зал тудуун база хынаан.
1967 чылда ажыттынганындан бээр Өөк суурда культура бажыңынга улуг чаартылгалар болбаан. Албан чериниң коллективи боттарның күжү-биле 690 дөрбелчин метр ниити шөлдүг тудугнуң материал-техниктиг байдалын ажаап-тудуп турза-даа, чамдык өрээлдерниң крышаларындан дамдылап, эт-севи эргижиреп каан.
«Культура» национал төлевилелге киржилге чүгле тудугнуң бодун эвес, а культура объектизиниң инфраструктуразын чаарткан. Фойени, көрүкчүлер залын, кабинеттерни, библиотеказын чаартып, шупту соңгаларны, эжиктерни, электри четкизин, чылыг системазын солуп, крышазын бүрүнү-биле септеп, даштып чаартып, культура бажыңының котельнаязын база септээн.
Владислав Ховалыг Өөк клувунуң септелгезин бодунуң контролюнда ап, эрткен чылдың августан бээр чаңгыс эвес удаа аңаа четкен. Республиканың Баштыңы ажылдың түңнелдерин таныжып көргеш, бүрүн чаартынган культура бажыңы суур чонун хаара тудар сорунза апаарын бодунуң блогунда демдеглээн: «Суурнуң чурттакчыларының чогаадыкчы болгаш бүгү талалыг хөгжүлдезинге амгы үениң шөлү ажыттынарынга өөрүп тур мен» - деп, ол бижээн.
Культура бажыңының чаартылгазы тус черниң чурттакчыларынга болгаш культура болгаш уран чүүлге ынак бүгү-ле кижилерге онзагай болуушкун болган. Албан черинге билдингир коллективтер ойнап, ургулар бөлгүмнери болгаш чогаадыкчы студиялар ажылдап, 150 кижини доктаамал долдуруп турар көрүкчү залдыг амгы үениң дыштанылга төвү апарган.
Владислав Ховалыг ангарлыг спортчу шөлдүң тудуунга база четкен. «Күш-культура болгаш массалыг спортту хөгжүдери» деп федералдыг программа езугаар төлевилел боттанып турар.
Тываның Спорт яамызының удуртулгазы-биле боттуң тудугжуларын ажыглап тургаш, спортчу объектини тудуп турар. Тудуг эгелээнден бээр кожууннуң шупту спортчу албан черлеринден болгаш ажылчын коллективтерден эр улус бригадалары ында ажылдап турар. Суурнуң херээжен чону тудугжуларны изиг чем-биле чемгерип турар. Тываның Спорт яамызы бо арга чарыгдалдарны эвээжедиринден аңгыда, албан черлериниң ажылдакчылары ажылының онзагайын билир болганындан, тудугну дүргедедиринге деп бүзүрелдиг.
Өөктүң аныяк чурттакчыларынга объект командалыг болгаш чаңгыстың спортчу хевиринге халас киржир арганы бээр деп Владислав Ховалыг демдеглеп, регион чазааның кол угланыышкыннарының бирээзи – республиканың кожууннарында культура болгаш спортка амгы үениң байдалдарын тургузары болур дээрзин демдеглээн.