Тываның Баштыңы Владислав Ховалыг Туранга ажыл-агыйжы сургакчылаашкынының үезинде, Бии-Хем кожууннуң төп эмнелгезинге четкен. Республиканың удуртулгазының деткимчези-биле 2021 чылда «Кадыкшыл» национал төлевилелди боттандырып, эмнелгениң амбулатория бажыңынга улуг септелгени кылган. «2018-2025 чылдарда кадык камгалалының хөгжүлдези» регионалдыг программа езугаар эрткен чылын бо тудугнуң соңгаларын болгаш эжиктерин чаартып, эмнелгениң котельнаязында ийи чаа котелду салган.
Владислав Ховалыг эмнелге коллективи-биле албан чериниң техниктиг дериг-херекселиниң амгы байдалын болгаш кадрлар айтырыын чугаалашкан.
Бо хүнде Бии-Хемниң төп кожуун эмнелгезинде 23 эмчи база 150 хире эмчи сестралары болгаш биче персонал ажылдап турар. Поликлиника бирээзинде-ле 1700 кижи бактааттынган дөрт участокту хандырып турар. Эмнелгениң терапия, хирургия, педиатрия, божудулга, гинекология, халдавырлыг аарыглар, туберкулезка удур салбырларында 59 орун бар. Ийи тускай мергежилдиг хирург эмчилер планныг кезиишкиннерни кылып турар. Тускай шериг операциязының киржикчилеринге болгаш хоочуннарынга эмчи дузазын чедиреринче онза кичээнгейни угландырган. Эмнелгениң дыңнатканы-биле алырга, кожуундан 39 шериг албанныглар реабилитацияны эрткен, оларның 26-зы эмнээшкинин дооскан, байдалы элээн экижээн.
2006 чылда Кемеровонуң күрүнениң эмчи академиязын дооскан аныяк эмчи Май-оол Сат эмнелгени удуртуп турар. Ол республиканың №1 эмнелгезинде уруглар хирургиязынга интернатуразын эртип, Иркутскиниң күрүнениң эмчи университединге ол-ла угланыышкынга ординатураны дооскан. Сахалин облазынга ажылдаан. Бо чылдың сентябрьдан эгелеп ол Бии-Хемниң төп кожуун эмнелгезин удуртуп турар.
Коллективте аныяк специалистер хөй, оларның чамдыызы өске регионнарга ажылдааш, төрээн кожуунунга чанып келгеннер. Чижээ, терапевт эмчи Чодураа Чолдаголова Абаканга сес чыл ажылдааш, бо чылдың июльда эмнелгеде ажылдап кирген. Владислав Ховалыг аныяк эмчилерниң чанып келгенин деткип, кожуунунуң болгаш республиказының кадык камгалал системазын быжыглаарынга олар идигни бээрин демдеглээн.
2029-2030 чылдарда Бии-Хемниң төп кожуун эмнелгезинде чугула үе-чада болур: чыдар эмнелгениң оран-савазынга капитал септелгени кылыр деп, Тываның кадык камгалал сайыды Анатолий Югай дыңнаткан. Ооң-биле чергелештир, айыттынган хуусааларны манап олурбайн, бо чоокку үелерде агар септелгелерде эмнээшкин салбырларын чаартып алырын республиканың удуртулгазы сүмелээн.
Бии-Хемниң төп кожуун эмнелгезин бүрүнү-биле өскертип чаартырынга стационарның капитал септелгези стратегтиг чугула базым болур деп Тываның Баштыңы Владислав Ховалыг санаан. Кожууннуң төп эмнелгезинге чораан соонда, ол бодунуң блогунда, республикада эмнелге албан черлериниң эде чаартылгазы Тываның Чазааның мурнады көөр айтырыы деп демдеглээн. Эрткен чылын модернизация программазы-биле Бай-Тайга, Каа-Хем, Мөңгүн-Тайга, Тес-Хем, Кызыл кожууннарда эмнелге албан черлери чаартынган.