Тываның Баштыңы Владислав Ховалыг биле регионалдыг иштики херектер яамызының удуртукчузу Юрий Завьялов Бии-Хем кожуунга ажылчын сургакчылаашкын үезинде, Туран хоорайның №7 полиция пунктузунга четкеннер. Ийи удуртукчу муниципалдыг тургузугда оперативтиг байдалды көрүп, килдистиң оран-савазын хынап, хууда состав-биле ужурашкан. Кем-херек үүлгедиишкиннерин эвээжедир болгаш корум-чурум үрээшкиннерин болдурбас дээш ведомстволар аразында кады ажылдажылганы быжыглаар даалганы берген.
«Килдистиң хууда составы-биле ужураштывыс. Чугула айтырыгларны: ажыл албанны организастаанын, ажылдакчыларның материал-техниктиг чепсеглели кандыгыл, кадрлар айтырыын канчаар шиитпирлеп турарын чугаалаштывыс. Кожуунда чурумун тудары-биле хүннүң-не 30 ажыг полиция ажылдакчылары үнүп турар. Ужуражылга үезинде эгеки истелге килдизиниң аныяк ажылдакчызы Чинчи Арган-оолга эрге алганының бирги погонун байырлыг байдалга тывыстывыс» - деп, Владислав Ховалыг хыналданың түңнелин дыңнаткан.
Оперативтиг байдалды чугаалажып тура, кожуун девискээринде мал оорлаар таварылгалар хөй апарганы демдеглеттинген. Полиция ажылдакчыларының демниг ажылының ачызында ол талазы-биле организастыг үүлгедигни чорудуп турган бөлүк кижилерни тудуп хоругдаан.
«Шивилиг» эрттирилге пунктузу таварыштыр арага продукциязы болгаш наркотиктиг бүдүмелдерни хоойлуга удур сөөртүр, ол ышкаш хуу сайгарлыкчыларның база «адрестер» деп адаар хоойлуга удур арага садып турар черлерни илередип тывар даалганы ажылдакчыларга берген. Оон аңгыда назы четпээннерниң корум-чурум үрээшкиннерин болдурбазынче база «Енисей» Р-257 федералдыг автоорукка айыыл-халаптарны эвээжедиринче онза кичээнгейни угландырган.
«Шивилиг» стационар постуну эде чаартырынче онза кичээнгей угланган. Владислав Ховалыг ол постуга амгы үениң дериг-херекселдерин, ооң иштинде фото болгаш видео бижидер системаларны тургузарының база федералдыг автооруктуң ол участогунга «Айыыл чок хоорай» автоматчыткан информация системазын салыр планнар барын дыңнаткан.
Тыва Республиканың иштики херектер сайыды, полицияның генерал-майору Юрий Завьялов, полиция пунктузун декабрьда полиция килдизи кылдыр эде кылырын дыңнадып, амгы үеде кезектиң бактаап турары 1944 чылда туттунган ол оран-савага улуг септелге негеттинип турар-дыр деп демдеглээн.
Республика Баштыңы кожуун чагыргазының бажыңынга, регионнуң яамылар болгаш ведомстволар, Бии-Хем кожуун удуртукчуларының, регионалдыг ИХЯ-ның аңгы-аңгы кезектериниң удуртукчулары киришкен ажылчын хуралды эрттирген. Кем-херек үүлгедиишкиннерин эвээжедири болгаш ведомстволар аразында кады ажылдажылганы экижидер талазы-биле айтырыгларны чугаалажып көрген.