Тываның Баштыңы Владислав Ховалыг биле иштики херектер сайыды Юрий Завьялов ажыл-агыйжы байдалда ужурашкан. Ужуражылга үезинде ийи тала республикада корум-чурум камгалаар болгаш кем-херек үүлгедиишкиннерин болдурбазының айтырыгларын сайгарып, кады ажылдаарының кол угланыышкыннарын тодаратканын Владислав Ховалыг дыңнаткан.
Ужуражылга үезинде республикада эрткен 10 айның дургузунда кем-херек үүлгедиишкининиң көргүзүглерин сайгарган. , Үптекчи чоруктар саны 30 хуу, соок чепсектиг кем-херек үүлгедиишкиннери 23 хуу, эзирик байдалда база назы четпээннер корум-чурум үүлгедиглери эвээжээни эки көргүзүг деп демдеглеттинген. Ооң-биле чергелештир, орук озал-ондактарының саны 23 хуу өскенинге удур комплекстиг хемчеглер негеттинип турарын ийи тала демдеглээн.
Айыттынган үе дургузунда Каа-Хем, Улуг-Хем, Барыын-Хемчик, Сүт-Хөл кожууннарда кем-херек үүлгедиишкиннериниң ниити көргүзүү элээн өскени демдеглеттинген.
Аппарат хуралында Владислав Ховалыг республикада кем-херек үүлгедиишкининиң байдалының дугайында баш бурунгаар медээлерни берген, үстүнде айыттынган кожууннарның удуртукчуларынга боттарының девискээрлеринде оперативтиг байдалды экижидер талазы-биле чогуур хемчеглер планнарын ажылдап кылгаш, таныштырарын дааскан.
IT-технологиялар ажыглаан кем-херек үүлгедиишкиннер саны 14,9 хуу көвүдээнин барымдаалап, Чурагайлыг хөгжүлде яамызынга кибер-кем-херек үүлгедиглери-биле демисежир немелде комплекстиг хемчеглерни, ооң иштинде чонга тайылбыр ажылдарының хемчеглерин ажылдап кылырын дааскан.
Владислав Ховалыг орук озал-ондак байдалын чавырылдырары-биле элээн каш, ооң иштинде оруктарның байдалын экижидер даалгаларны берген. Кудумчу-орук четкизинге айыыл-халаптарны тургузуп турар чылдагааннарны хынаар даалганы Орук-транспорт яамызынга берген. Кудумчу чырыын киирип, орук демдектерин болгаш херимнерни чедир тургузарынга чеже акша-хөреңги херегин санаар. Кышкы үеде, ылаңгыя айыыл-халап болур черлерде, орук септелгезин күштелдирер.
Владислав Ховалыг Юрий Завьялов-биле ажылчын байдалда ужурашканын бодунуң блогунда дыңнадып, ийи тала боттарының сорулгаларын база чурттакчы чоннуң айыыл чок чоруун хандырар дээш, республиканың удуртулгазы биле корум-чурум камгалаар органнарның кады сырый ажылдажылгазы база демниг күжениишкиннери-биле чедип алырын демдеглээннер.