Республиканың эмчи колледжизи 80 чылдаан юбилейин демдеглеп турар. Ол 1945 чылда Кызылдың фельдшер-акушер школазы кылдыр ажыттынгаш, тыва эмчи кадрларын белеткээринге чугула базым болган. Область эмнелгезиниң баазазынга ажыттынган школа 8 ай курстуг эмчи сестраларын база 2 чыл курстуг фельдшерлерни белеткеп, кичээлдерни орус дылдан тыва дылче очулдуруп эрттирип турган. 1948 чылда 10 фельдшер-акушерлер, оларның аразында 6 тыва бирги доозукчуларны үндүрген.
Баштайгы чылда берге болган. Ол үениң отчеттарында суугу-биле одаар үш бичежек класстарга, керосинниг лампа чырыынга, тускай кабинеттер база спорт залы чок черге кичээдер эртип турарын бижээн. Ындыг болзажок, 1945 чылдан 1953 чылга чедир ортумак мергежилдиг 144 эмчи ажылдакчыларын белеткээн. Колхозтарда көдээ эмчи пунктуларын эмчи кадрлары-биле хандырып, Тывага кадык камгалалының оон ыңай сайзыраарынга үндезинни салган.
Ажылындан чардыкпайн өөренир арганы сургуулдарга берип, 1952 чылда эмчи сестраларының кежээки салбырын ажыткан.
Практиктиг кичээлдер хоорай эмнелгелеринге эртип, а шылгараңгай доозукчулар Сибирьниң дээди эмчи өөредилге черлеринге улаштыр өөренир арганы алган. 1953-1954 өөредилге чылынга чедир школага 233 студент өөренген.
Тыва автономнуг областың күш-ажылчыларының депутаттар чөвүлелиниң Күүсекчи комитединиң шиитпири-биле, 1954 чылда Кызылдың фельдшер-акушер школазын эмчи училищези кылдыр эде чаарткан. 1967 чылда училище республиканың ортумак эмчи кадрларынга хереглелин бүрүнү-биле хандырып, Совет Эвилелиниң өске регионнарындан эмчи ажылдакчыларын чалаарын соксаткан. Фельдшер-акушер школазы тургустунганындан эгелээш, ортумак эмчи звенозунуң специалистерин белеткээр кол болгаш чаңгыс өөредилге чери бооп арткан.
2009 чылда өөредилге чери эмчи колледжизи статусту алган.
80 чылдың дургузунда колледж эмчи херээ, акушер херээ, сестра херээ, эмчи-профилактика херээ, профилактиктиг стоматология, ортопедиктиг стоматология, фармация болгаш лабораторлуг диагностика дээш, аңгы-аңгы эмнээшкин угланыышкыннарынга 10 муң ажыг специалистерни доостурган. Доозукчулар чоннуң кадыкшылын камгалаар хүлээлгезин чедиишкинниг күүседип, оларның чамдыызы кадык камгалал адырында удуртукчулар болгаш эртем ажылдакчылары бооп ажылдап чоруурлар.
Бөгүн колледж эң хереглелдиг амгы үениң өөредилге программалары-биле ажылдап турар. Тускай сорулгалыг олуттарга өөредилге эрткен сургуулдар доозуптарга-ла ажылга тургустунары магадылалдыг. Өөредилге чери доозукчуларынга регионнуң эмнелге черлеринге ажылды тып алырынга азы дээди өөредилге черлеринче улаштыр дужаап киреринге дузалажып турар. Колледжте амгы үениң негелделери езугаар өөредилге чорудуун организастаарынга бүгү-ле чогуур байдалдар бар.