Тываның культуразының алдарлыг ажылдакчызы, чер-чурт шинчилекчизи база журналист, Тыва Республиканың Национал музейиниң Сафьянов аттыг төөгү болгаш чер-чурт шинчилел филиалының удуртукчузу Татьяна Евгеньевна Верещагина «Нацияның чоргааралы-2025» деп Бүгү-россияның VI -гы хөй-ниити премиязының лауреады деп атка төлептиг болган. Ол «Хамааты чаңгыс демни болгаш чоннар аразында эп-найыралды хандырарынга үлүг-хуузу дээш» деп номинацияга тиилээн.
Республиканың Баштыңы Владислав Ховалыг Татьяна Верещагинаның тиилелгези – чонну каттыштырып, национал ужур-чаңчылдарның байлаан кадагалап арттырар дээн бодунуң ажыл-херээнге бердингениниң көскү үлегер-чижээ-дир деп демдеглээн.
«Бистиң чаңгыс чер чурттуувус Татьяна Евгеньевна Верещагина «Нацияның чоргааралы – 2025» деп Бүгү-россияның VI -гы хөй-ниити шаңналының лауреады болган. Бо бедик шаңнал –бистиң чуртувустуң хөй талалыг культуразын кадагалап арттырган болгаш чоннар аразында тайбыңны быжыглаарын ооң хөй чылдарда күш-ажылынга, ажыл-херээнге бердингенинге, эгээртинмес күжүнге төлептиг үнелел-дир» - деп, Владислав Ховалыг демдеглээн.
Татьяна Верещагинаның билдилиг удуртулгазы-биле Туранда Сафьянов аттыг төөгү болгаш чурт-шинчилел салбыры республиканың амыдыралынга улуг рольду ойнаан Сафьяновтарның өг-бүлезиниң дугайында материалдарны үш он чыл дургузунда чыып келген.
Владислав Ховалыгның демдеглээни-биле алырга, «... Татьяна Евгеньевнаның революсчу, хөй-ниити ажылдакчызы, тыва күрүне тургузуунуң үндезилекчилериниң бирээзи Иннокентий Георгиевич Сафьянов онза ылгалып, ооң кайгамчык династициязының төөгүлүг өнчү-салгалын шинчилеп көөр дээн инициативазы Россияның аңгы-аңгы булуңнарындан эрге-чагырга төлээлерин, эртемденнерни, хөй-ниитини хаара туткан езулуг ужуражылга шөлү апарган».
Татьяна Верещагина 1981 чылдан тура амгы үеге чедир Сафьянов аттыг төөгү-чурт-шинчилел филиалын удуртуп турар. Ол Тываның орус чурттакчыларының этнографиязы, төөгүзү болгаш культуразынга хамааржыр материалдарның байлак коллекциязын чыып тургускан. Ол интернационалчы болгаш патриотчу кижизидилгеге улуг үлүг-хууну киирген аңгы-аңгы угланыышкыннарга темалыг кежээлерни болгаш лекцияларның организатору, Тываның болгаш Мурнуу Сибирьниң шупту культурлуг болгаш эртем хемчеглериниң идепкейлиг киржикчизи.
Татьяна Евгеньевнаның хөй чылдарда эртем болгаш чурт-шинчилел ажылының, ажыл-херээнге хей-аъдының болгаш бердингениниң ачызында, Туранда филиал Тываның музей чыындызының «алдын фондузун» тургузуп турар катаптаттынмас болгаш сонуурганчыг экспонаттарны чыгган. Ол музейге ажылдап турган үезинде, төрээн хоорайы Туранның болгаш ооң бүдүрүлгелериниң тургустунганының болгаш хөгжүлдезиниң төөгүзүн, Бии-Хем кожууннуң болгаш республиканың хөгжүлдезинге улуг үлүг-хуузун киирген чаңгыс чер чурттугларының салым-чолун, республиканың арга-арыг ажыл-агыйының төөгүзүн, И.Г. Сафьяновтуң ук салгалының өске-даа кежигүннериниң амыдырал-чуртталгазы болгаш ажыл-чорудулгазын шинчилээн.
Россияның Журналистер эвилелиниң кежигүнү Татьяна Верещагина элээн каш: «Туран» (2005), «Бо шупту музей» (2010), «Эккендей» (2004), «Күрүне ужур-дузалыг херек» (2008, 2016 чылда катап парлаттынган) база "1922 чылдан 1991 чылга чедир Бии-Хемниң комсомол организациязының төөгүзү" деп номнарның автору.
2024 чылда Сафьяновтар аттыг музейге «Өг-бүле» национал төлевилелдиң «Өг-бүлениң үнелиг чүүлдери болгаш культура инфраструктуразы» деп федералдыг төлевилел шугуму-биле бүрүн септелгени кылган. Татьяна Евгеньевнаның удуртулгазы-биле чаарттынган музей бажыңынга темалыг ужуражылгалар, делгелгелер, экскурсиялар болуп турар. Туран школаларының өөреникчилери музейниң күзелдиг аалчылары.
2024 чылда Татьяна Евгеньевна Верещагинага чурт-шинчилел адырында чедиишкиннери база төрээн чериниң төөгүзүн кадагалап арттырганы дээш төрээн Бии-Хеминиң дээди муниципалдыг шаңналы – Бии-Хем кожууннуң Хүндүлүг хамаатызы деп атты тывыскан.