Тываның найысылалы Кызыл хоорайга 2025 чылда республиканың эртем форуму болуп эртер. Хемчег келир пятницада, ноябрь 21-де, «Субедей» спорт комплекизинге 10:00 шакта эгелээр. Президент Владимир Путинниң чарлааны 2022-2031 чылдарда Россия Федерациязында эртем болгаш технологияларның он чылының хемчеглери-биле форум чылдың-на эртип турар.
Хемчегниң организатору Тыва Республиканың Өөредилге яамызы демдеглээни болза, «Эртем0+» делегей фестивалының, регионнар аразының аныяктарның VII-ги инновация форумунуң база «Артпром» технофорумнуң шөлдерин ажыглап форум эртемни, инновацияларны, бизнести мөөңнеп каттыштырар. Форум Тываның эртем организацияларын болгаш өөредилге черлерин, бизнес төлээлерин, аңгы-аңгы бүдүрүлгелерни чаңгыс черге чыыр. Киржикчилер регионнуң хөгжүлдезинге салдарлыг болгаш ооң келир үезин өскертип болур боттуг ажылдарны, шинчилелдерни болгаш төлевилелдерни таныштырар.
Тываның күрүне университеди, Тываның гуманитарлыг болгаш тускай социал-экономиктиг шинчилелдер институду, Биосфера шинчилелдериниң төвү, Национал школа хөгжүлдезиниң институду, Тываның көдээ ажыл-агыйының эртем-шинчилел институду, Эмчи-социал айтырыглар болгаш эргелеп-башкарылга эртем-шинчилел институду база Россияның эртемнер академиязының Сибирь салбырының Тываның бойдус курлавырларын комплекстиг шинчилээр институду дээш, республиканың шупту эртем албан черлери форумга киржир.
«Эртем кижи бүрүзүнге» деп кыйгырыг-биле эртип турар «Эртем0+» фестиваль профессионалдарга, школачыларга, студентилерге болгаш өг-бүлелерге солун болур ужурлуг. Фестивальдың киржикчилери экология, медицина, агротехника, IT болгаш тускай эртемнер дээн ышкаш, янзы-бүрү адырларда инновациялар-биле таныжар. Өөредилге талазын сонуургап турар улуска оларның угаан-медерелин калбартыр болгаш улаштыр өөрениринче чүткүлдү тып алыр лекцияларны, мастер-класстарны, эртем көргүзүглерин организастаан. Школачылар эртем делегейиниң келир үезин көөр онзагай аргаларны алыр.
Форумга киржип турар эртем организациялары болгаш бизнес төлээлери кады ажылдаар эштерни, дагдыныкчыларны азы стартап идеяларны тып алыр арганы бээр чугаалажыышкынга белен. Форумга Тываның регионалдыг эртемни болгаш экономиканы хөгжүдеринге идиг бээр төлевилелдерже кичээнгейни углап, тус черниң байдалдарында шинчилелдерни боттуг ажыглаарын көргүзер.
Кызылга республиканың эртем форуму – анаа-ла делгелге эвес, а чугаалажыр, сорук киирер, практиктиг аргалар шөлү апаарын организакчылар айыткан. «Амгы үениң эртемин көрүп, эксперттерге айтырыгларны салып, боттарының амыдыралын болгаш регионнуң хөгжүлдезин өскертип болур идеяларны билип алырлар. Тывага улуг эртем байырлалынга киржир арганы ажыглаңар» - деп, республиканың Өөредилге яамызы кыйгырган.