Тыва республиканың найысылалының төп шөлү – Арат шөлүнге эрткен Тиилелге парадының идепкейлиг киржикчилерин ооң-биле шаңнаар. Эрткен неделяда Тываның Баштыңы Владислав Ховалыг «Арат шөлүнге Тиилелге чыскаалынга киришкени дээш» деп адаар тураскаалдыг медальды тургузар дугайында чарлыкка атты салган.
Медальдың дугайында дүрүм езугаар, Россия Федерациязының Чепсектиг Күштериниң шериг албанныг болгаш хамааты албан хаакчыларынга, национал гвардия шерииниң дайынчыларынга, эки турачы күштерге, күүсекчи эрге-чагырга органнарының ажылдакчыларынга база шериг чыскаалынга хууда составты, чепсекти база шериг техниканы белеткээринге идепкейлиг киришкен өске-даа хамаатыларга болгаш ону эрттиринге көргүскен эки ажылы дээш ону тыпсыры көрдүнген.
Медальды 36 мм диаметр хемчээлдиг, 3 микрон кылын, шала эргижирей берген алдынналчак өңнүг кылдыр цинк холуксаазындан куткан. Медальды беш булуңчук хевирлиг, 24 мм калбак ак болгаш ногаан шыйыгларлыг торгу кожааны илчирбе таварыштыр быжыглаар.
Медальдың мурнуку талазында кырыкы кезээнде, Совет Эвилелиниң, Россия Федерациязының болгаш Тыва Республиканың киискип турар туктарының мурнунда езулал берип чыскаал бөлүүн достайтыр шуткуп кылган. Төп кезээнде «1941-1945 чылдарда Ада-чурттуң Улуг дайынынга тиилелгениң 80 чылы» деп дөстегер бижик бар. Ооң адаанда беш-булуңчук сылдыс артында венок, ооң үстүнде "2025" деп саннар бар.
Медальдың артыы талазында даглар болгаш хемниң баарында ‹Азия төвү» тураскаалды сиилбээн. Ооң кырында «Арат шөлүнге Тиилелге чыскаалынга киришкени дээш» деп бижикти үш одуруг кылдыр чарган. Адаанда – дөстегер сылдыстыг боодал чечектер ортузунда «Кызыл хоорай» деп бижик бар.
Документиде медальды салгалдарның уламчызын, Россияның болгаш Тываның чоннарының чаңгыс демин көргүзүп турар деп тайылбырлаан. Ол ышкаш дайзынны тиилээринге республиканың киирген үлүг-хуузун сагындырып турар. Ногаан дилиндек российжи шериг хевиниң өңүн база Төрээн чурт камгалакчыларын илереткен. Ак өң амыр-тайбыңны, арыг-силигни база шынчы чорукту көргүскен.