«Көдээ девискээрлерниң комплекстиг хөгжүлдези» күрүне программазы-биле Таңды кожууннуң Бай-Хаак суурда көдээ клуб тудуу чоруп турар. Амгы үеде тудуг ажылдары доозулган, тудугжулар иштики ажылдарны доозуп, долгандыр девискээрни чаагайжыдып турар.
Тыва Республиканың Чазааның Даргазының оралакчызының хүлээлгезин күүседип турар Аяс Хунай-оол «Көдээ девискээрлерниң комплекстиг хөгжүлдези» күрүне программазы-биле акшаландырган төлевилелдерниң күүселдезин неделя санында хынап турар.
Таңды кожууннуң Бай-Хаак суурда 250 олуттуг көдээ клуб – 2025 чылда ажыглалче кирери планнаттынган улуг объектилерниң бирээзи. Таңды кожуун чагыргазы-биле муниципалдыг керээ чарган «Суугу» КХН тудугну кылып турар.
Октябрь эгезинде тудугну хынап чорда, чамдык ажылдар графиктен озалдап турары билдинген. Ынчан тудугну дүргедедир айтыышкынны берген турган. «Ростудугконтроль» федералдыг албан чери база кожуун чагыргазы керээ езугаар ажылдың шынарын контрольда алган.
Бо чылын «Көдээ черлерниң комплекстиг хөгжүлдези» күрүне программазы-биле көдээ черлерде элээн каш кол инфраструктура объектилериниң тудуу доозулганын Тываның Экономиктиг сайзырал болгаш үлетпүр яамызы демдеглээн.
«Көдээ суурларның амгы овур-хевири» төлевилел күүселдези-биле Улуг-Хем кожууннуң Чодураа суурда 176 өөреникчиге школа тудуу доозулган. Шагаан-Арыгның Малчын кудумчузунда суг хандырылга четкизин чаартып, 1 дугаар ниити билиг школазын база 150 уругга уругларның уран чүүл школазын бүрүнү-биле септеп турар.
«Көдээ черлерниң чаагайжыдылгазы» төлевилел-биле Кызыл кожууннуң Сукпак суурда уруглар ойнаар шөлдү, Бай-Тайга кожууннуң Ээр-Хавак суурда хөй ажыглалдыг спортчу шөлдү, Тес-Хем кожууннуң Самагалтай суурда роллер-дром болгаш скейт-паркты база Өвүр кожууннуң Хандагайтыда «Россия – Тыва» тураскаалды чаагайжыдар.