Тыва Республиканың ИХЯ-ның күрүне автоинспекциязының аңгы ОПА ротазының дежурный кезээнче кирген дыңнадыгдан алырга, Таңды кожуун девискээринге 1 шак 10 минута турда болган орук озал-ондаанга 6 кижи амы-тынындан чарылган. Айыыл-халап Алдын-Булак деп турисчи комплекс чоогунга болган.
Баштайгы медээлерден алырга, Шагаан-Арыгже бар чораан «Toyota Wish» автомашинаның 55 харлыг чолаачызы удур орук шимчээшкининче киргеш, уткуштур чоруп олурган «Toyota Voxy»-биле үскүлешкен. Машиналар кайы хире дүрген чоруп турганын ам тодарадыр. Авария үезинде беш кижи ол дораан өлген. 17 харлыг аныяк оол кемдээшкиннеринден реанимацияга чок болган.
Тываның Баштыңы Владислав Ховалыгның даалгазы-биле, Тыва Чазак Даргазының оралакчызының хүлээлгезин күүседип турар Айдыс Сынаа айыыл-халап болган черже дарый четкеш, байдалды тодараткан. Айыыл-халап элээн каш кижилерниң амы-тынын алган. Улуг-Хем кожууннуң Арыг-Бажы суурнуң 55 харлыг чурттакчызы бодунуң «Toyota Wish» машиназы-биле 6 чорук кижилерин сөөртүп чорааны илереттинген. Озал-ондак болган черни болгаш автомашинаны хоойлу-дүрүм камгалакчылары баш бурунгаар хынап көөрге, пассажирлерниң чедер черинге айыыл чок чедип алырынга идегеп турган машиназының артыкы дугуйлары чайгы болган, ол чүүл кышкы үеде айыыл чок чоруктуң дүрүмнеринге таарышпас.
Озал-ондактың түңнелинде «Toyota Wish» автомашинаның чолаачызы база үш пассажири: Шагаан-Арыг база Кызылдан 36 биле 60 харлыг ийи херээжен кижи база кым дээрзи билдинмес эр кижи дүрген дуза машиназы чедип келбээнде амы-тынындан чарылган. Озал-ондак болган черден Кызылдың 1 дугаар республика эмнелгезинче 14 биле 17 харлыг ийи назы четпээн уругну киирген. Каш шак болганда 17 харлыг оол эмнелгеге амы-тынындан чарылган.
Тываның Баштыңы Владислав Ховалыг мөчээн кижилерниң өг-бүлелеринге болгаш чоок улузунга ханы кажыыдалын илереткен.
"Бо дээрге эгиттинмес чидириг-дир. Бо берге үени эртеринге силерни долгандыр турар кижилериңерниң күжү болгаш деткимчези дузалаар-ла болзун - деп, Тываның Баштыңы чугаалааш, айыыл-халапка элээн каш чылдагааннар - хар чаап турар үеде орукта дүвү база орук шимчээшкинин сагывааны салдарлыг болганын демдеглээн. - Автомобиль айыылдыг техника дээрзин утпас ужурлуг бис, орукка серемчилел херек. Харлыг агаар-бойдус орукчуларга айыылды тургузуп турар. Тываның чурттакчыларын оруктарга кончуг кичээнгейлиг болурун, аргалыг болза, багай агаарлыг үеде ырак оруктан ойталаарын кыйгырып тур мен".
Владислав Ховалыг коргунчуг озал-ондактан берттинген кижилерни камгалаары-биле бүгү-ле чүүлдерни кылырын Тываның кадык камгалал сайыдынга айыткан. Республиканың орук транспорт сайыдынга оруктарның байдалын шыңгыы хайгааралга ап, оларны үезинде аштап-арыглаарын болгаш доштан арыглаарын хандырарын дааскан.
ИХЯ-ның Тыва Республика талазы-биле истелге эргелели озал-ондактың канчаар болганын истеп эгелээн. Тываның Орук-транспорт яамызының дыңнатканы-биле алырга, озал-ондак болган черниң оруун тускай техника-биле аштап, тайгакка удур чүүлдерни чашкан турган. Дүрүм ёзугаар, айыыл-халап үезинде оруктуң байдалы кандыг турганын база хынаар.