Республиканың найысылалында болгаш чамдык кожууннарында дүне өл хар чаапкан. Тываавтодорнуң дыңнатканы-биле алырга, регионнуң автооруктарында шимчээшкини анаа, орук албан черлери штаттыг чурумда ажылдап турар. Автоорук ажылдарынче он үш орук организациялары, 54 техника, 64 орук ажылчыннары хаара туттунган. Ылаңгыя улуг арт-сынныг оруктарда эң-не берге участоктарже кичээнгейни углаан.
Республиканың Орук-транспорт яамызы орук албан черлери үлдүргей хар аштап-арыглаарын күштелдирип, тайгакка удур тускай бүдүмелдерни чажып турарын дыңнаткан. Регионалдыг болгаш муниципалдыг оруктарны хандырып турар шупту организацияларда кывар-чаар чүүлдерниң курлавыры бар.
Кызылда болгаш Кызыл, Каа-Хем, Тожу кожууннарда 15-20 см чедир эң хөй хар дүшкен. Кызыл чоок-кавы оруктарда «ДСТ КХН» организация ажылдап турар. Компанияның орукчулары болгаш техниказы «Кызыл – Ээрбек – Баян-Кол», «Кызыл – Сарыг-Сеп», «Кара-Хаак – Черби» оруктарында, Сукпак, Кара-Хаак суурларже, Дөгээ даанче, Кызыл хоорайже кирер оруктарда харны аштап турар.
Хууда сайгарлыкчы В.Л. Юрковтуң орук техниказы «Бояровка – Тоора-Хем» орукта харны үстүрүп, орук кыдыында тайгакка удур элезин-сайны төккен. «102 км» арт кырында байдал таарымчалыг. Ындыг болзажок, чайгы дугуйлуг машина башкарары бергедээн болгаш, айыыл-халапты болдурбазы-биле илчирбени шарып алырын чорукчулар сагындырып турар.
«Абакан – Ак-Довурак» оруунуң 316-дан 324-кү километрге чедир участогунда (Сотый арт) «Абаза ОТСУ» КХН орукту кылыннаан хардан болгаш хөртүктерден арыглап турар. Арт кыры хаттыг.
Ак-Довурактың орук тудуг-септелге участогунуң ажаап-карактап турары Барыын-Хемчик кожууннуң «Чолалыг» (22-23 км) база «Көдүрер-Даш» (39-40 км) арттарында оруктарның байдалы ажырбас. Орук ажылдакчылары орукту болгаш харны аштап арыглап турар.
Өвүр кожуунда «Калчан» болгаш «Тээли» арт кырында туманныг, оруктарда байдал ажырбас деп, «Өвүрнүң ОТСУ» КХН дыңнаткан.
«Орукчулар» КХН «Хандагайты – Мугур-Аксы» оруунуң 119-125 километринде участокту үлдүргей хардан аштап турар, «Чолдак-Орук» арт кырында байдал чүгээр.
Республика девискээринде бүргег агаар-бойдусту база ам-даа хар чаарын барымдаалааш, орук шимчээшкининиң дүрүмнерин шыңгыы сагыырын, айыылдыг орук участоктарынга халдып чорааш, кичээнгейлиг болурун база чайгы дугуйларны кышкы дугуйлар-биле дарый солуурун Тываның Орук-транспорт яамызы чолаачыларга сагындырган.
Ведомство орук эртерде чүгле аңгылаттынган черлеп кежерин, машиналар кел чыдарын албан көрүп алырын чадаг кижилерге сагындырган.
Федералдыг болгаш регионалдыг оруктарга онза байдалдар тургустунуп кээр болза, дараазында диспетчер дугаарларынче долгаар:
«Тываавтодор» ККА: регионалдыг оруктар — 8(394-22) 21108, 8-929-358-0911.
«Упрдор Енисей» ФКА: федералдыг орук — 8 (391) 265-01-12, +79632521160.
Чаңгыс аай камгалал албаны — 112 кыска дугаарже долгаар.