Тываның Баштыңы Владислав Ховалыг «Тываның маадырлары» регионалдыг кадрлар программазының күүселдезин чугаалашкан хуралды эрттирип, оргкомитет кежигүннери программа киржикчилериниң белеткелиниң чамдык түңнелдерин, оларның чедиишкиннерин база төлевилел тиилекчилерин улаштыр ажылче хаара тударын сайгарган.
«Тываның маадырлары» төлевилел сес ай дургузунда ажылдап турар. Ол үе дургузунда тускай шериг операциязының хоочуннарындан чагыгларны чыып, сайгарып, 625 кордакчыларны хаара туткан мөөрейлиг шилилгени, чугаалажылганы чорудуп, төлевилел киржикчилериниң дагдыныкчыларын болгаш стажировка эрттирер черлерин тодараткан.
Бо чылдың сентябрьда Россияның улус ажыл-агый болгаш күрүне эргелеп-башкарылга академиязы Президент академиязы-биле кады Тываның күрүне университединиң баазазынга төлевилелдиң өөредилге кезээн эгелээн. Дыңнакчылар «Күрүне политиказы болгаш күрүне эргелеп-башкарылгазы» деп угланыышкынга бирги өөредилгезин чедиишкинниг дооскан. Бирги өөредилге чылында ниити өөредилге курузу 502 өөредилге шактарындан тургустунган.
«Киржикчи бүрүзүнге регионнуң билдингир удуртукчуларындан дагдыныкчыны быжыглаан, оларның хууда база профессионал сайзыралынга дузалап, арга-дуржулгазын дамчыдып турар. Амгы үеде программаның киржикчилери шилип алган адырларында стажировкалап турар. Россияның Маадыры Буян Кууларның дагдыныкчызы болганымда, аңаа бүгү талалыг деткимчени көргүзерин кызыдар мен» - деп, Владислав Ховалыг бодунуң блогунда дыңнаткан.
Төлевилел боттанып эгелээнден бээр тускай шериг операциязының хоочуну Иван Монгушту ажыл-чорудулганың чамдык хевирлерин чөпшээрээр болгаш хайгаараар талазы-биле регионалдыг албанның удуртукчузунуң оралакчызынга томуйлаан. ТШО хоочуну Эртине Кара-Сал Кызыл хоорайның Төлээлекчилер хуралының депутадында соңгуткан, ол ышкаш Тывада «Ада-чурт камгалакчылары» күрүне фондузунуң регионалдыг салбырының даргазының оралакчызы бооп ажылдап турар.
Амгы үеде удуртукчу албан-дужаалдарже төлевилелдиң тиилекчилериниң аразындан кандидаттарны томуйлаарынга сайгарылга турарын республика баштыңы база дыңнаткан.