Тываның Баштыңы Владислав Ховалыг Чоннуң чаңгыс деминиң хүнүнде, Меңги Хомушку-биле ужуражып, Россия Федерациязының Федералдыг Хуралының Федерация Чөвүлелиниң «Эрес-дидим чоруу дээш» деп медалын тывыскан. Бо чылдың апрельде Меңги Улуг-Хемге сугга дүже берген херээжен кижини камгалап, эрес-дидим чоруун көргүскен. Ынчан ол Кызылда Совет Эвилелиниң Маадыры Михаил Бухтуев аттыг 1 дугаар школага 11-ги клазынга өөренип турган.
Владислав Ховалыг ол болуушкун соонда дораан-на эрес-дидим аныяк оолду бодунуң ажылдаар черинче чалааш, дидим чоруу дээш четтиргенин илередип, хүндүлел бижик-биле шаңнаан. Ынчан Меңги ОБЯ-га албан эрттирер күзелин илереткен. Республиканың Баштыңы аңаа дээди өөредилге черинге дужаап киреринге дузалажырын аазаан турган.
«Бирги ужуражылгавыс үезинде-ле ол мерген угаанныын көргүскен чүве: «Бо дээрге бир-ле кижиниң авазы, бир-ле кижиниң ынак кижизи-дир» деп. Бөгүн Россия Федерациязының Федералдыг Хуралының Федерация Чөвүлелиниң «Эрес-дидим чоруу дээш» тураскаалдыг медалын Меңгиге онза чоргаарал-биле тывыстым» - деп, Тываның Баштыңы бодунуң блогунда Меңги-биле ужуражылгазын бижээн.
Владислав Ховалыг Меңгиниң Онза байдалдар яамызынга албан эрттирер күзели бүзүрелдиг боттанып турарынга өөрүшкүзүн илереткен. Ол амгы үеде ол тускай өөредилге чериниң студентизи. Республиканың Баштыңы аныяк оолга быжыг кадыкшылды, өөредилгезинге чедиишкиннерни күзээн.
«Маадыр уруглар» деп бүгү-российжи хамааты-патриотчу төлевилел 12 чыл дургузунда чугула болгаш буянныг ажылды чорудуп турар: эрес-дидим чорук кылган оолдар, уругларны тып, оларны деткип турар. Эрткен чылдарда бүгү Россиядан ийи муң хире уруглар болгаш элээдилер киришкен.
Бо чылын Тывадан ийи оол – айыылдыг байдалдарда кижилерниң амы-тынын камгалап алганы дээш медальдар-биле Меңги Хомушку база Кызылдың 3 дугаар школазының өөреникчизи 15 харлыг Тимофей Титов шаңнаткан.