Ноябрьның 4-те, Чоннуң чаңгыс дем хүнүнде, Тываның Чазаа күрүне шаңналдарын тывыскан. Тываның Баштыңы Владислав Ховалыг езулалдың киржикчилеринге чоннуң байырлалы-биле байыр чедиргеш, ооң амгы үеде ужур-дузазын айтып, ниити айтырыгларны шиитпирлээрде ниитилелди каттыштырып, чурт иштинде тайбыңны болгаш билчилгени кадагалаары чугула деп демдеглээн.
Владислав Ховалыг байырлыг езулалдың киржикчилеринге, Россияның чонунуң бодунуң черин болгаш хосталгазын камгалаарынга быжыг тура-соруун болгаш маадырлыг чоруун көргүскен төөгүлүг үелерни сагынган.
«Бистиң ниитилел чаа кыйгыларга таварышкаш, күрүнениң иштинде тайбыңны болгаш эп-найыралды кадагалаар ниити сорулга-биле демнежип шыдаарын база катап бадыткаан. Россияның күчү-күжү ооң чаңгыс демниинде, бот-боттарын хүндүлежип, деткижип чоруурунда дээрзин төөгү база катап угаадып турар» - деп, Баштың чугаалаан.
Владислав Ховалыг аңгы-аңгы адырларның төлээлеринге: өөредилге, кадык камгалал, культура, спорт адырында ажылдакчыларга, а ол ышкаш тускай шериг операциязында Ада-чуртту камгалашкан дайынчыларга шаңналдарны тывыскан.
Россияның Маадыры, гвардияның лейтенантызы Мерген Донгакка Россия Федерациязының Президентизиниң Өөрүп четтириишкин бижиин тывысканы хемчегниң онзагай болуушкуну болган.
Гвардияның лейтенантызы Чингис Хомушку «Эрес-дидим чорук» ордени, бичии лейтенант Алексей Попов «Эрес-дидим чорук дээш» медаль-биле шаңнатканы, оларның албан-хүээлгезин эрес-дидим болгаш төлептиг күүседип чоруурунга бедик үнелел деп демдеглээн.
Эрзин төп кожуун эмнелгезиниң эмчи сестразы Светлана Бады «Тыва Республиканың кадык камгалалының алдарлыг ажылдакчызы» деп атты алган. Өвүр кожууннуң Хандагайты суурда «Хүнчүгеш» уруглар садының кижизидикчизи Римма Куулар, Берт-Даг школазының математика болгаш физика башкызы Вера Санчат, Шамбалыг школазының эге класс башкызы Дадар Мортуй-оол өөредилге адырында чедиишкиннери дээш «Тыва Республиканың өөредилгезиниң алдарлыг ажылдакчызы» аттарга төлептиг болган.
Чөөн-Хемчиктиң төпчүткен библиотека системазының директору Ирина Скорыхка «Тыва Республиканың культуразының алдарлыг ажылдакчызы» атты тывыскан. Улуг-Хем кожууннуң спортчу хүреш тренери Херел Тагба тренер ажылында көскү чедиишкиннери дээш «Тыва Республиканың күш-культура болгаш спорттуң алдарлыг ажылдакчызы» атты алган.
«Авырга» спорт школазының хүреш тренери Владимир Түлүшке «Тыва Республиканың алдарлыг тренери» деп атты тывыскан. Тываның «Саяннар» хөгжүм болгаш танцының национал театрында дээди категориялыг балет артизи Субудай Хомушку «Тыва Республиканың алдарлыг артизи» атты алган. «Твой информ» ниитилел-политиктиг информастыг солуннуң штаттан дашкаар корреспондентизи Лидия Иргит уран-чечен чогаалды хөгжүдеринге киирген үлүг-хуузу дээш «Тыва Республиканың Улустуң чогаалчызы» деп атка төлептиг болган.
Дыңнавас спортчулар школазында улуг тренер башкы Артыш Доржу күш-культура болгаш спортту хөгжүдеринге киирген үлүг-хуузу дээш «Шылгараңгай күш-ажылы дээш» Тыва Республиканың медалы-биле шаңнаткан.