Владислав Ховалыг тускай шериг операцияларының зоназынче ажыл албан аайы-биле чорааш, 55-ки гвардейжи мотоадыгжы бригаданың (дагжы) шериг албанныгларынга 10 чылдаан юбилейи-биле байырын чедирип, шылгараан шериг албыннгыларга күрүне шаңналдарын тыпсып, шериг кезектеринден дайынчыларның дилээ-биле саткан техниктиг дериг-херексеелдерниң ээлчеглиг база партиязын дамчыткан.
«Президент бистиң дайынчыларывыстың чедиишкиннерин бедии-биле үнелээн. Ол ышкаш 55-ки гвардейжи бригаданың шериг албанныгларының Донбассты неонацистерден хостаарынга улуг үлүг-хуузун кезээде демдеглеп чорууру дээш коллегам, Донецк Улусчу Республиканың Баштыңы Денис Владимирович Пушилинге өөрүп четтиргеним илередип тур мен» - деп, Тываның Баштыңы бодунуң блогунда бижээн.
Владислав Ховалыг Тыва Республиканың дээди күрүне шаңналы – Буян-Бадырга ордениниң III чергезин 55-ки гвардейжи мотоадыгжы бригаданың командири, гвардейжи полковник Андрей Каминскийге тывыскан. Ада-чуртту камгалаарынга эрес-дидим болгаш коргуш чок чоруу база дайынчы албан хүлээлгезинге шылгарааны дээш 55-ки гвардейжи мотоадыгжы бригаданың шериг албанныгларынга «Эрес-дидим чоруу дээш» медальдарын, «Эрес-маадыр чорук дээш» медалаьдарның I база II чергелери, Жуков медальдарын, ол ышкаш Донецк Улус Республиканың күрүне шаңналдарын тывыскан.
Владислав Ховалыг ол болуушкун дугайында дыңнадыында Дээди кол командылакчы Владимир Владимирович Путинниң Кутузов орденин тывысканы - 55-ки гвардейжи бригаданың 10 чыл оюнга эң чугула шаңнал болганын онзалап демдеглээн.
Күрүне шаңналдарын тыпсырындан аңгыда, дайнычыларның дилээ-биле саткан бөлүк техниктиг дериг-херекселдерни алганнар.
«УАЗ» биле «Соболь» автомашиналарның артык кезектерин болгаш дугуйларын шериг кезээниң эмчи албанынга, а мотоциклдерни, квадрокоптерлерни, дрон детекторларын, дизельдиг генераторларны бригаданың дайынчы кезектеринге дамчыткан.
Тывадан аңгы-аңгы девискээрлерде, ооң иштинде Курск, Белгород, Запорожье, Луганск Улус Республикада шериг кезектеринге албанын эрттирип турар дайынчыларның хууда чагыглары-биле квадрокоптерлер, дрон детекторлары, дизельдиг генераторлар, мотоциклдер дээш янзы-бүрү техниктиг дериг-херекселдерни база берген. Шупту 90 хире эң херек дериг-херекселдерни дамчыткан.
Владислав Ховалыг Тывадан шериглерге ачы-дузаны доктаамал көргүзүп турарын демдеглеээн. Чүгле 55-ки бригада эвес, а республиканың үндезин чурттакчыларының шериг албанын эрттирип турары өске-даа шериг кезектери доктаамал дузаламчыны ап турар.