Ноябрь 12-де «Россия 24» телеканалга Тыва Республиканың Баштыңының киржилгези-биле дорт дамчыдылга болур. Владислав Ховалыг регион чурттакчыларының «Госуслуги» порталында pos.gosuslugi.ru/lkp/direct... удур харылзаа шөлү база тускай ажылдап кылган forms.yandex.ru/u/68feecd7... чат-бот таварыштыр киирген айтырыгларынга харыыларны бээр.
«Хүндүлүг чаңгыс чер чурттуглар! Чаңчыл болу берген дорт дамчыдылгавыска удавас ужуражыр бис. Тускайлаттынган үе дургузунда ажылывыстың кол түңнелдерин үндүрүп, бо чоокку үениң планнарын чугаалажып, республиканың чурттакчыларын дүвүреткен болгаш чидиг айтырыгларынга харыылаарын кызыдар мен. Кижи бүрүзү дамчыдылгага киржип, бодунуң бодалын илередип, санал-оналын киирер боор деп идегеп тур мен» - деп, ол бодунуң блогунда дорт дамчыдылганың хүнү болгаш шагын дыңнаткан.
«ВКонтакте» социал четкиде Владислав Ховалыгның хууда арнынга дорт эфирни дамчыдар.
Чугаа үре-түңнелдиг болгаш ажыктыг болур кылдыр, айтырыгларыңарны баш бурунгаар чорударын Тываның Баштыңы сагындырган.
Владислав Ховалыг регионнуң баштыңы албан-дужаалче кирген дораан-на чон-биле харылзажырының дорт дамчыдылга хевирин ажыглап эгелээн.
Эрткен чылын Тываның Баштыңының Вконтакте социал четкиде хууда арынынга база «ОТР» телеканалга ийи шак үргүлчүлээн дорт дамчыдылгазы чергелештир чоруп турганын сагындыраал. Дорт дамчыдылга эгелээр шак үеге чедир чурттакчы чондан 500 хире айтырыг кирген, оларның 370-и - аңгы-аңгы каналдар таварыштыр.
Владислав Ховалыг ам болур дорт дамчыдылганы дыңнадып тура, чон-биле удур-дедир харылзаага кезээде беленин дыңнаткан.