Тываның Баштыңы Владислав Ховалыг республиканың чонунуң өмүнээзинден база бодунуң өмүнээзинден Моолдуң чонунга болгаш Тыва-биле кызыгаарлажып чыдар Увс аймактың чурттакчыларынга аймактың губернатору Сэмжидийн Батжаргалдың чок болганы-биле ханы кажыыдалын илереткен. Моолдуң Увс аймааның губернаторунуң оралакчызы Эрденебаата Баатарсанның адынче кажыыдалдың телеграммазын чоруткан.
Сэмжидийн Батжаргал аар аарыгдан 43 харлыында чырык ортемчейден чарлып чоруткан. Аныяк удуртукчунуң удуртулгазы-биле Увс аймак көскү чедиишкиннерни чедип алганы демдеглеттинген.
Губернаторнуң баштааны делегация бо чылдың майда Тиилелге хүнүн демдеглээри-биле Тывага аалдап кээп чораанын сагындырайн. Моолдуң эрге-чагыргазының шиитпири-биле, май 9-та Кызылга Тиилелге хүнүнүң парадынга кожа-хелбээ күрүнениң кызыгаар шериглери болгаш каайлы ажылдакчылары киришкеннер. А июль төнчүзүнде Сэмжидийн Батжаргалдың чалааны-биле Владислав Ховалыг Увс аймактың тургустунганындан бээр 100 чыл оюнга тураскааткан байырлал хемчеглеринге киришкен.
«Ону таныыр кижи бүрүзүн эгиттинмес бо чидириг дүвүредипкен. Долу шүш-шыдалдыг, чырык күзелдерлиг, төрээн чериниң патриоду, чонунга сеткилинден бердинген, талантылы удуртукчунуң хенертен мөчээни-биле кажыыдалыңарны үлежип тур бис».
Сэмжидийн Батжаргалдың дугайында чырык сактыышкын бистиң чүректеривиске кезээ мөңгеде артар. Бистиң регионнарывыстың аразында найыралчы болгаш акы-дуңма харылзааларны хөгжүдеринге ооң киирген уллуг үлүг-хуузу канчаар-даа аажок улуг.
«Увс аймактың бүгү чонунуң улуг чидиригниң бо шагында, ооң өг-бүлезинге, эш-өөрүнге болгаш бүгү чонунга сеткиливис ханызындан кажыыдалдың сөстерин илередип тур бис» - деп, Тываның Баштыңы кажыыдалын илереткен.