Тываның Баштыңы Владислав Ховалыг 2007 чылдан 2014 чылга чедир республиканың культура яамызын удуртуп чораан Тыва Республиканың уран чүүлүнүң алдарлыг ажылдакчызы Вячеслав Донгактың мөчээни-биле кажыыдалын илереткен.
Салым-чаяанныг балетмейстер болгаш модельер, «Эдегей» театрының үндезилекчизи, «Алдын-Булак» турисчи комплекизиниң дизайнери, республиканы алдаржыткан хөй-хөй чогаадыкчы төлевилелдерниң автору Вячеслав Октябрович Донгак октябрь 27-де 71 харлыында чырык ортемчейден чарлып чоруткан.
«Вячеслав Октяброович Донгактың мөчээниниң дугайында ханы кажыыдалды дыңнадым. Бистиң республика культураның шылгараңгай ажылдакчызын, ёзулуг патриотту чидирген, ооң ажыл-ижи бистиң чүректеривиске кезээ мөңгеде артып каар. Салым-чаяанныг балетмейстер, режиссер болгаш дизайнер бүгү назынын төрээн чуртунга бараалгаткан. «Эдегей» танцы болгаш костюм театры, ол ышкаш «Алдын-Булак» турисчи комплекс – Тываның езулуг эртинелери апарган. Сайыттып чорааш регионнуң культуразын сайзырадып хөгжүдеринге канчаар-даа аажок улуг үлүг-хуузун ол киирген. Вячеслав Октяброович - амыдырал-чуртталгазы кандыг-даа шаптараазынны ажып эртеринге талант болгаш тура-сорук дузалааарының көскү үлегери-дир» - деп, республиканың Баштыңы Владислав Ховалыг бодунуң кажыыдалын илереткен.
Оюн-көргүзүглерниң катаптаттынмас профессионалы болгаш режиссеру Вячеслав Октяброович «Саяннар» национал ансамблинге, ол ышкаш Калмыкияның, Хакасияның, Бурятияның, Кемерово облазының, Алтай болгаш Красноярск крайларның, Кыргызстанның база Моолдуң ат-сураглыг уран чүүл коллективтеринге чогааткан салган танцы-самнары өртээ турбас өнчү кылдыр артып каан.
Вячеслав Октяброовичиниң чок болганы чүгле тыва культурага эвес, а бүгү республикага улуг чидириг-дир.
Кайгамчык кижи-биле байырлажылга Улусчу чогаадылга бажыңынга 2025 чылдың октябрь 29-та 9.30-ден 10-30-ге чедир болур.
Улуг мастер чырык сактыышкын бооп артар.