Тываның ниити өөредилге черлеринде эгелээн өөреникчилерниң күскү дыштанылгалары ноябрь 2-ге чедир үргүлчүлээр. Бо үеде республиканың шупту муниципалдыг тургузугларында хоорай болгаш суурларның өөредилге, спортчу, культура, социал албан черлеринде түр када дыштаныр төптер ажылдап эгелээри чаңчыл апарган. Ол төптерде янзы-бүрү хемчеглер, мастер-класстар болгаш чогаадыкчы ужуржалгалар эртип турар. Өөреникчилер чурулгадан эгелээш танцыга чедир янзы-бүрү угланыышкыннарга бодун шенеп, чаа сонуургалдарны тып алыр аргалыг.
Тываның Баштыңы Владислав Ховалыг республикада 300 ажыг түр үениң дыштанылга төптери ажылдап турарын, аңаа 18 муң ажыг уруглар болгаш аныяк өскен солун болгаш ажыктыг кылдыр үезин эрттирип болурун бодунуң блогунда дыңнаткан. «Республиканың Өөредилге яамызынга болгаш тус чер бот-башкарылга органнары уругларның дыштанылгалары чымыштыг, солун боорда, айыыл чок эртеринге бүгү-ле аргаларны кылырын дааскан мен» - деп, Владислав Ховалыг демдеглээн. Ол ышкаш дыштанылга үезинде уруглар улуг улустуң хайгааралы-биле мага-хандыр дыштанып, талантызын ажыдып, кадыкшылын быжыглап, хөглеп алыр арганы хандырары чугула деп демдеглээн.
Тываның Өөредилге яамызының дыңнатканы-биле алырга, дыштанылга үезинде школачыларга чогаадыкчы делегейже, спортче болгаш чаа билиглерже шымнып кирер янзы-бүрү хемчеглерни организастаан. Октябрь 25-те эгелээн Бүгү-россияның «Хөм бөмбүк» биче-футбол маргылдаазының школачы шилилде неделя төнчүзүнге чедир уламчылаар. Бичии спортчулар школазын төлээлеп бүгү-российжи деңнелинге киржир эрге дээш демисежир. Ооң-биле чергелештир республиканың ниити өөредилге черлериниң командалар аразынга «Школаларда баскетбол» деп бүгү-российжи баскетбол маргылдаазының шилилге маргылдаалары эгелээн.
Школаларның театр коллективтери болгаш студиялары октябрь 29-та болуп эртер «Театр дээрге бис» деп республиканың уругларның театр фестиваль-конкурузунга эң-не тергиин деп ат дээш мөөрейлежип, боттарының шиилерин бараалгадыр. Уруглар боттарының уран талантызын ажыдып, сценаның езулуг сылдыстары кылдыр боттарын көргүзер. Октябрь 31-де орук шимчээшкининиң дүрүмнерин сагыырының чугулазын көргүскен орук шимчээшкининиң аныяк инспекторларының чыскаалы болуп эртер.
Оон аңгыда янзы-бүрү өөредиглиг конкурстарны организастаар, ол ышкаш «Авангард» өөредилге-методиктиг төпке шериг албанын эрттирбейн турар аныяктарга беш хонук дургузунда белеткел лагерин ажылдадыр. Уругларның дыштанылгазын солун, өөредиглиг болгаш айыыл чок эрттирер арганы бо бүгү хемчеглер бээр.
Владислав Ховалыг бодунуң блогунда ада-иелерге болгаш башкыларга сагындырган. Ол оларга организастыг бөлүктерниң чурттакчылыг черлерден дашкаар кандыг-даа үнүүшкүннеринге чөпшээрел албан херек дээрзин сагындырган. «Биске, улуг кижилерге, бичии уругларның айыыл чок чоруу бирги черге турар ужурлуг» - деп, Тываның Баштыңы демдеглээн.