Калмыкияның Баштыңы Бату Хасиков Тывада аалдап келген. Ол республикада Россияның буддийжи университединиң ажыдыышкынынга киришкен. Владислав Ховалыг социал четкилерде бодунуң блогунда аалчының келгенин дыңнадып тура, буддийжи региондан коллегазы Тываже келирин шагда-ла күзеп чораанын, ам-на эптиг арга – Россияда бүгү буддистерге чугула болуушкун тыптып келгенин демдеглээн.
«Чоокта чаа-ла Элистага III-кү делегей чергелиг буддийжи форум үезинде шупту чыглып турдувус, келир 2026 чылда бистиң Тывавыска ол чугула форумну эрттирер эстафетаны аңаа хүлээнип алган мен. Бату Сергеевич-биле доктаамал харылзаада бис» - деп, Тываның Баштыңы демдеглээн.
Бату Хасиков бо чылын Калмыкияга эрткен III-кү делегей чергелиг сарыг шажын шуулганының сүлде-демдээ статуэтканы Владислав Ховалыгга байырлыы-биле белекке берген. Статуэткада Будданың овур-хевирин база амыдырал болгаш сайзыралдың демдээ – Бодхи ыяжын база чүдүкчү улустуң ыдыктыг демдээ, ол ышкаш форумнуң ИТ технологиялар-биле харылзаазы болгаш ооң темазы «Чаа муң чылда буддийжи делегей» деп теманы көргүскен лотостуң адаанда нейрон четки хевирлиг дазылдарлыг лотосту ында кылган.
Тываның хөгжүм-шии театрынга болган Россияның буддийжи университединиң байырлыг ажыдыышкынынга Калмыкияның баштыңы киришкеш, республиканың чурттакчыларынга онзагай болуушкун-биле байырны чедирип, университеттиң ректору, Камба-Лама Гелонг Лоден Шерабка база лама-башкыларга ак орукту болгаш профессионал чедиишкиннерни, а хуурактарга эки өөредилгени база шажынчы өзүлдени күзээн.
«Ада-чурттуң сарыг шажын өөредилгезин хөгжүдеринге бо чугула базым-дыр. Чаа университет шажын чүдүлге ажылдакчыларын белеткээр болгаш буддийжи культура болгаш философия талазы-биле билиглерни тарадыр төп апаар ужурлуг. Калмыкия, Тыва база Бурятия – сарыг шажынга чүдүп чоруур чоннуг регионнар-дыр. Ындыг дээди өөредилге чериниң тургустунганы – Россияның чоннарын каттыштырган үндезин үнелиг чүүлдеривисти деткиир болгаш харылзааларывысты быжыглаар бир арга» - деп, Хасиков онзалап демдеглээн.
Бату Хасиков байырлыг хемчегге киришкеш, Тываның найысылалының культурлуг тураскаалдыг черлери-биле танышкан. Ол Алдан-Маадыр национал музейин, «Азия төвү» скульптура комплекизин, «Тубтен Шедруб Линг»хүрээзин, «Алдын-Булак» этнокультура комплекизин сонуургаан.
Октябрь 24-те, пятницада, Бату Хасиков Тываның Баштыңының Кубогу дээш кикбоксингиге республика маргылдаазының ажыдыышкынынга хүндүлүг аалчы болуп киржир. Бату Хасиков – спорттуң бо хевиринге делегейниң каш дакпыр чемпиону база Россияның кикбоксинг федерациязының президентизи. Владислав Ховалыгның чугаазы-биле алырга, ол Россияның регионнарында кикбоксинги хөгжүлдезинче улуг кичээнгейни салып чоруур.