2026 чылда Россия Федерациязының Президентизиниң культура, уран чүүл, креативтиг (чогаадыкчы) индустрия адырларда төлевилелдер боттандырылгазынче грант шаңналын тыпсыр дээн, Президентиниң Культурлуг инициативалар фондузунуң (2026) ийиги грант мөөрейинче чагыг киирер кампания 2025 чылдың октябрь 15-те эгелээн болгаш, 2025 чылдың декабрь 2-де доостур.
«Чогаадыкчы идеяларны саналдаар болгаш боттандырар күзелдиг кижи бүрүзүнге Президентиниң культура инициативаларының фондузу ажык. Чүгле чогаадыкчы чедиишкинниг ажылдыг эвес, а бюджет, календарьлыг план, төлевилел тургузуу болгаш партнерлардан деткимче алыр талазы-биле, боттуг сүлде-сүзүк, мөзү-бүдүш өөредиинде дээштиг ажылдап, боттандырып чоруур чагыглар деткимчени алыр. Үзел-бодалдарны боттандырып шыдаптар төлевилелдерни манап турар бис» - деп, Президентиниң Культурлуг инициативалар фондузунуң чиңгине директору Роман Карманов демдеглээн.
Эрткен чылын Президентиниң Культурлуг инициативалар фондузунуң 13-кү конкурузунуң тиилекчилер санынче Тыва Республикадан Роланда Санданның «Тываның оолдарының маадырлыг чоруктары. Мөңге сактыышкын!» төлевилели кирген. Президент фондузунуң деткимчези-биле грант алыкчызы тускай шериг операцияларының мурнуку одуругларынга бажын салган чаңгыс чер чурттугларының маадырлыг чоруун мөңгежидер темага республиканың бот-тывынгыр чогаадыкчы болгаш театр коллективтериниң аразынга фестиваль-конкурсту организастап, ол бичии хемчээлдиг шиилерниң видео-көргүзүглерин интернетче салган. Ол ышкаш тыва дайынчыларның дугайында 200 очерк кирген «Тыва Республиканың Сактыышкын номунуң» ийиги кезээн база парладып үндүрген.
Мөөрейге коммерцияга хамаарышпас организациялар, коммерциялыг болгаш муниципалдыг албан черлери, хууда сайгарлыкчылар киржип болур. Олар Россияның салым-чолу-биле чаңгыс; Хөй националдыг чон; Кады бис; Тургузукчу нация; Мөзү-бүдүш үндезиннери; Быжыг өг-бүле; Бистиң күжүвүс – шында; Ада-чурт камгалалында; Аныяк лидерлер; Чедиишкинниг чурт; Культурлуг онзагайлар; Ыдыктыг чер деп, 12 темалыг угланыышкынче боттарының инициативаларын киирип болур. Билдириишкинге айтыр кол негелдениң бирээзи: төлевилел 17 үндезин сүлде-сүзүк болгаш мөзү-шынар үнелиг чүүлдериниң кайызынга (Президентиниң No 809 чарлыы-биле) дүгжүп турарын айтыры албан.
Культура, уран чүүл болгаш чогаадыкчы адырларда төлевилелдерни бүгү талалыг деткиири дээш Россияның Президентизи Владимир Владимирович Путинниң Чарлыы-биле 2021 чылда Культура инифиативаларының Президент фондузун тургускан.
Фондунуң албан езузунуң сайтызы – фондкультурныхинициатив.рф/ конкурстуң дугайында тодаргайы-биле билип ап болур.