Дүүн Россияда Адалар хүнүн демдеглээн. Президент Владимир Путинниң чарлыы-биле 2021 чылдың октябрь 4-те хүннү тургускан болгаш, оон бээр өг-бүле институдун быжыглаарынче болгаш ажы-төл кижизидилгезинче ада кижиниң ролюн бедидеринче угланган бүгү-российжи албан езузунуң байырлалы апарган. Тываның Баштыңы бо онзагай хүн-биле регионнуң чурттакчыларынга байырны чедирген. Владислав Ховалыг ажы-төлдү кижизидеринге ада кижиниң ролюн онзалап демдеглеп, тыва чоннуң адаларга хүндүлелдиг хамаарылгазын демдеглээн.«Ада кижи – бисти күштүг, чөптүг болгаш шынчы болурунга өөредип турар кижи-дир. Аданың ынакшылы онзагай — ол бисти бот-тускайлаң болурунга өөредип, ынчалза-даа кезээде деткимчени берип чоруур. Ада болуру дээрге чүгле өөрүшкү эвес, а улуг харыысалга. Ада болуру дээрге, ажы-төлүнге үлегер-чижек болуру, оларга амыдыралдың эң чугула бүгү чүүлдеринге өөредири-дир. Ынчангаш ол онзагай хүнде бүгү чурт Адалар хүнүн демдеглеп турар бис» - деп, республиканың баштыңы байыр чедириишкининде айыткан.
Адаларның мерген угаанын болгаш арга-дуржулгазын хүндүлеп, өг-бүлениң эр ээзинге, улуг кижилерге, Төрээн чуртунга болгаш чоок кижилеринге – эр улуска хүндүткелди аныяк салгалга кижизидер чаңчылдарны республикада кадагалап арттырып турарын Владислав Ховалыг демдеглээн.
Регионнуң удуртукчузу байырлал хүнүнде адаларга байырны чедиргеш, быжыг кадыкшылды, чечектелиишкинни, оларның ажы-төлү чедиишкиннери-биле өөртүп, үнелеп, деткип чоруурун күзээн.
Республикада чылдың-на Адалар хүнүн демдеглеп, ниитилелге ада кижиниң ролюн болгаш ужур-дузазын көргүскен янзы-бүрү хемчеглер эртип турар. Бо чылдың онзагай болуушкуннарының бирээзи – Кызылдың Аныяктар парыгынга аллеяны олуртканы. Хемчегниң киржикчилери парктың хостуг черлеринге хадының 12 өзүмнерин тараан. Алыс кедизинде ол девискээр өг-бүлениң езу-чаңчылдарын кадагалап арттырарынга адаларның киржилгезиниң чугулазын демдеглээн «Адалар аллеязы» деп аттыг апаары чадавас.
Адалар хүнүнде үлегерлиг өг-бүле баштыңнарынга шаңналдарны база тывыскан. Оолдары Ада-чуртун камгалап турар эрлерни база аңгы демдеглээн. «Ачам – мээң камгалакчым» деп республика чергелиг адалар шуулганының үезинде «Дайынчының ачазы» деп хөй-ниити үнелелиниң медалын тыпсыр езулалды эрттирген. Сергей Дамдынчапович Монгуш, Мирон Шулууевич Миндин, Тэмир Павлович Монгуш, Олег Санааевич Хертек ол медальдарга төлептиг болган.