Пандито Камба-Лама Гелек Нацык-Доржунуң удуртулгазы-биле Россияның сарыг шажынчылар ассамблеязының эгелээшкининиң ачызында республикада дээди сүлде-сүзүк өөредилгези катап эгелээр аргалыг апарган. Ол эгелээшкинни Күжүгет Шойгу аттыг культура фондузунуң удуртулгазы деткээн. 2025 чылдың январь 14-те Россияның биддизм университеди – шажын организациязы тургустунган.
Россияның эң улуг Тубтен Шедруб Линг сарыг шажын хүрээзиниң баазазынга тургустунар университет буддийжи организацияларга чүдүлге ажылдакчыларын болгаш шажын дыңнакчыларын белеткээр төп апаар. Ооң ажыл-чорудулгазы буддийжи чүдүлгени өөредир болгаш нептередиринче, ол ышкаш федералдыг күрүне стандарттарынга дүүштүр дээди өөредилге программаларын боттандырарынче угланган болур.
Гелонг Лоден Щераб, анаа ады Долаан Александрович Уржанай, университеттиң ректору албан дужаалда соңгуткан, а Индияның Варанаси хоорайның Төп дээди тибет шинчилелдер институдунуң доозукчузу, буддийжи философияның магистри, ачарья Самтен Митук, анаа ады Начын Владимирович Кунуужап, эртем талазы-биле проректор кылдыр томуйлаткан.
Университет үш кол угланыышкыннарга өөредилгени бээр: буддизм философиязы, буддийжи медицина болгаш буддийжи уран чурулга. Ону өөредири-биле тускай өөредилге программаларын болгаш нормативтиг эрге-хоойлу актыларын ажылдап кылган, өөредилге ажыл-чорудулгазынга херек бүгү чөпшээрелдерни алган.
Россияның буддизм университединге чүгле Тывадан студентилер эвес, а бүгү Россиядан болгаш делегейден күзелдиг кижилер өөренип болур. Индияның, Кыдаттың, Непалдың, Мьянманың болгаш Моолдуң эң улуг буддийжи хүрээлери-биле делегей чергелиг идепкейлиг кады ажылдажылга планнаттынган.
2025 чылдың август 8-те Университет өөредилге лицензиязын алган, ол чөпшээрел шажын чүдүлге ажылдакчыларын болгаш дыңнакчыларын белеткээр эргезин бадыткап турарын сагындыраал.