Бүгү-российжи байырлалга тураскааткан 30 ажыг хемчеглер-биле республикада Адалар хүнүн демдеглээн. Кызылдың культурлуг хөгжүлде төвүнге эрткен «Мээң ачам – мээң камгалакчым» деп республика чергелиг адалар шуулганы кол болуушкуннарның бирээзи болган. «Тыва Республиканың эрлер болгаш адалар чөвүлели» деп регионалдыг хөй-ниити организациязы форумну организастаан.
Өг-бүлеге болгаш ниитилелге ада кижиниң ролюн болгаш эрге-байдалын көдүрери – форумнуң кол сорулгазы болган. Муниципалдыг тургузугларны, Адалар чөвүлелдерин, үлегерлиг адаларны, эр башкыларны болгаш өске-даа хөй-ниити организацияларын төлээлээн 200 ажыг кижи форумга киришкен. Республика Баштыңының өмүнээзинден кел чыдар байырлал-биле чыылган чонга Тываның Чазааның Даргазының оралакчызы Орлан Сарыглар байырны чедирген.
Форум үезинде, мөзү-бүдүш кижизидилгезиниң «Эр чол» ада-ие программазын ажылдап кылгаш, ону боттандырарынга сайгарылгалыг сессия база болган. Тывага эр кижилерни идепкейжидер ёзулалды таныштырган мастер-класска форумнуң киржикчилерин хаара туткан. Полководчу Сүбедей Маадырның төөгүлүг алдар адын кадагалап арттырар фондуну тургузарының дугайында айтырыгны база чугаалашкан.
Чыыштың төнчүзүнде, ведомство, хөй-ниити, күрүне шаңналдарын база эң-не тергиин адаларга «Дайынчының ачазы» деп хөй-ниитиниң үнелел медальдарын байырлыы-биле тывыскан.