Тыва Республиканың Культура яамызы 2026 чылда планнаттынган IV делегей чергелиг буддийжи шуулганның ылгавыр демдээнге төлевилел ажылдарын хүлээп турар. Бо хүннерде баштайгы төлевилелдерни дужаап эгелээн.
Мөөрейге чурукчулар, дизайнерлер болгаш архитекторлар дээш, форумнуң онзагай овур-хевирин сиилбип чуруурунга үлүг-хуузун киирер күзелдиг кижи бүрүзү киржип болур. Шажынчы хемчегниң билингир сүлде демдээн чогаадырда, амгы тыва культураның бот-тускайлаңын көргүзери – мөөрейниң кол сорулгалары.
Организакчылар ооң аңгыда, киржикчилерниң уран-чечен болгаш чогаадыкчы салым-чаяанын илередип, деткиирин база республиканың культурлуг байлак өнчү салгалын нептередир сорулганы салган.
Мөөрейге чогаадыкчы бөлүктер болгаш аңгы кижилер-даа киржир болур. Киржикчилер сүлде демдекче логотипти болгаш тускай овур-хевирниң элементилерин киирер ужурлуг. Дужаар ажылга кол негелделер: эскизтерни электроннуг хевирге дужаар, а логотипке «Тыва Республикада IV делегей чергелиг сарыг шажыг шуулганы» деп форумнуң адын бижиир. Чуруктуң бөдүүн боорда, делгем уктазын илередирде, үүрмек детальдардан ойталаары чугула.
Мөөрей 2025 чылдың ноябрь 10-га чедир уламчылаар, төлевилелдиң тиилекчизи 100 муң рубль акша шаңналын алыр. Бо дээрге чогаадыкчы көрүштүг кижилерге боттарын көргүзеринге болгаш чугула культурлуг болуушкунга үлүг-хуузун кииреринге дыка эки арга. Чагыгларны болгаш мөөрей ажылдарын яамының электроннуг почтазынче чорудар. Киржикчи бүрүзү форумнуң аянныг чараш аян-хевирин тургузарынга каш янзы бодалдарын болгаш аргаларын көргүскен үш хире ажылды киирип болур.
Тываның Баштыңы Владислав Ховалыг Тывага IV делегей чергелиг буддийжи форумнуң эртерин чарлаанын сагындыраал. Чурттуң Президентизи Владимир Путин база Буддизм өөредилгезин болгаш эртем-шинчилел ажылын деткиир фонд ол эгелээшкинни деткээн.
«Тыва Республика келир чылын дөрткү делегей чергелиг буддийжи форумну эрттирер эстафетаны хүлээп алыр. Ону төлептиг уламчылаар дээш, амдыгааштан белеткелди эгелеп, бар-ла күжениишкиннеривисти угландырар. Бистиң кады күжениишкиннеривис Россияда буддийжи культураны улам быжыглаарынга идигни бээр дээрзинге бүзүрээр мен» - деп, Ховалыг бодунуң блогунда демдеглээн.