Кызылдың Аныяктар ордузунга тускай шериг операциязының киржикчилеринге болгаш оларның өг-бүле кежигүннеринге тускай ажылчын олуттар ярмарказы болуп эрткен. «Россияда ажыл» кадрлар төвү-биле «Ада-чурт камгалакчылары» күрүне фондузунуң регионалдыг салбырының ТШО киржикчилерин деткиири-биле эрттирип турары ийи дугаар ярмарказы ол. Бо удаада республикадан 20 ажыг ажыл берикчилери 400 хире хостуг олуттарны сүмелээн. Дөрт шак дургузунда хемчег үргүлчүлээн, ажыл тывыкчылары ажыл берикчилериниң саналдарындан аңгыда, регионнуң күш-ажыл рыногунда 1200 ажыг өске-даа хостуг ажылчын олуттарны база өөренип көргеннер.
Тываның Чазааның Даргазының оралакчызы Орлан Сарыглар, күш-ажыл болгаш социал политика сайыды Эдуард Сандан база регионда «Ада-чурт камгалакчылары» фонд салбырының удуртукчузу Мерген Кызыл-оол ярмарканы байырлыы-биле ажытканнар.
Орлан Сарыглар Тываның Баштыңы Владислав Ховалыгның өмүнээзинден чыылганнарга байырны чедирип, ТШО киржикчилерин болгаш оларның өг-бүлелерин деткиири - чазактың мурнады боттандырар айтырыы-дыр деп демдеглээн. «Чыл эгезинден «Россияда ажыл» кадрлар төптеринче 151 ТШО киржикчизи билдириишкиннерни киирген, оларның 67-зи ажылда тургустунган, 16-зы хууда ажыл-херээн ажыткан, а 14-ү чаа мергежилдерде өөренип турарлар. Хоочун бүрүзүнге ажылга хаара тудар планны аңгы тургускан» - деп, О.Сарыглар демдеглээн.
«Эльбрусметалл-Литий» КХН, «Тыва даг-руда компаниязы» КХН, «Лунсин» КХН, «Россети Сибирь Тываэнерго» АН дээн ышкаш улуг компаниялар ярмаркага киржип, хостуг олуттарны таныштырган.
«Эльбрусметалл-Литий» КХН-ниң хостуг олуттарын 40 ажыг кижи сонуургап, оларның 37-ү чугаалажылганы эрткен. Компания вахта ажылынче чалап турар. Росгвардияның Тыва Республикада эргелели дуңзаалакчыларны, полиция эмчилерин, ОМОН дайынчыларын, чолаачыларны, юристерни чалаан. 30 ажыг кижи консультацияны алган, 15 кижи баш бурунгаар хыналданы эрте берген.
«Лунсин» компания энергетика инженерлеринге, электромонтерлар, электросварщиктер, чолаачылар болгаш өске-даа специалистерге ажылчын олуттарны саналдаан. Оон аңгыда, ярмарканың киржикчилери Кызылдың ЧЭТ, ТР-ниң ИХЯ, РФ-тиң Кеземче херээн күүседир федералдыг албанның ТР-де эргелели, «Бастион», «Руммаркет», «В-Стройком» компаниялар, «Центр-А» хуу таңныыл компаниязы, 12 база 17 дугаар школалар болгаш өске-даа ажыл берикчилери-биле ужурашкан.
Ярмарка ажыл тып алыр аргалардан аңгыда, анализтер дужаар, ЭКГ, флюография, маммография эртер болгаш терапевтиге шинчидер диспансеризацияны саналдаан. Республиканың Консультативтиг-диагностика төвүнүң болгаш республиканың 1 дугаар эмнелгезиниң Консультативтиг-диагностика поликлиниказының специалистери шинчип хынаар. Клиниктиг психолог база консультацияларны берген. Күзелдиг кижилер психологтуг тренингини эрткен.
Ооң-биле чергелештир, Социал фондунуң регионалдыг салбырының, Адвокаттар палатазының, Кызыл хоорай мэриязының социал политика департаментизиниң, Промсвязьбанкының, Национал банкының, Эмчи-социал экспертизаның бюрозунуң, Хөй талалыг ажыл-чорудулгалыг төптүң специалистери ачы-дузаларны көргүзүп, консультацияларны эрттирип ажылдааннар.
Ол-ла хемчег үезинде, чепсекти чыыр болгаш эптээринге мөөрей база болган. «Ахматтың» дайынчызы, крап береттиң эдилекчизи Азият Догдугаш 23 секунда эң эки үени көргүзүп, тиилээн.
«Ада-чурт камгалакчылары» фонд филиалының дыңнатканы болза, тускай ярмаркага 150 ажыг кижи келген, оларның аразында дайынчы хөделиишкиннерниң 70 ажыг хоочуннары бар. Кызыл хоорайдан база Кызыл, Каа-Хем, Таңды, Бии-Хем, Тес-Хем, Эрзин, Тожу, Мөңгүн-Тайга кожууннардан киржикчилер аңаа келген. Ярмарка үезинде, ажыл берикчилери-биле чугаалажылга чоруп турда, ТШО кежигүннери болгаш оларның өг-бүле кежигүннери 103 резюмени киирген.