Тывада «Бүгү-ле экини уругларга» деп федералдыг программа күүселдези-биле ниити билиг школалары төрээн чурттуң айыыл чок чоруу болгаш камгалалы база күш-ажыл кабинеттеринге амгы үениң дериг-херекселдерин ап турар. «Аныяктар болгаш уруглар» национал төлевилелдиң бир кезээ регионда өөредилгениң шынарын бедидер сорулгалыг.
Школалар «Төрээн чурттуң айыыл чок чоруунуң болгаш камгалалының үндезиннери» база «Күш-ажыл» өөредилге кабинеттерин дериири-биле, амгы үениң өөредилге херекселдерин алыр. Технология класстарынга ыяш-биле ажылдаар станокту, даараныр машиналарны, демир-биле ажылдаар фрезерлиг станокту садып салыр. Бо херекселдер өөреникчилерге келир үеде амыдыралынга болгаш профессионал ажылынга ажыктыг практиктиг мергежилдерни шиңгээдип алырынга дузалаар.
«Төрээн чурттуң айыыл чок чоруунуң болгаш камгалалының үндезиннери» класстарга янзы-бүрү ок-чепсектиң, чижээ, Калашников автомадының, Макаров пистолединиң майыктарын бээр. Улуг-даа, бичии-даа кижилерниң чүрек-өкпезин катап ажылдадырының аргаларын шиңгээдип алырынга дузалыг өөредилге материалдары-биле четчелээшкинче онза кичээнгейни угландырган. Уруглар ол тренажерларны ажыглап, кымга-даа ажыктыг апаар бирги дуза чедирилгезин шиңгээдип алырлар.
Регион бюджединден кады акшаландырыышкын-биле 20 ажыг млн. рубль түңге чаа дериг-херекселдерни саткан.
«Республикада 106 өөредилге черлеринге дериг-херекселдерни удавас үлээр. Чоокта чаа улуг септелгелер эрткен өөредилге черлери болгаш чаа школалар бо даңзыже кирбейн турар, чүге дизе олар дериг-херекселдер-биле дериттинген» - деп, Тыва Республиканың Өөредилге яамызы демдеглээн.
Чурттуң Президентизи Владимир Путинниң эгелээшкини-биле «Амыдыралдың айыыл чок чоруу» школа эртемин 2024 чылдан эгелеп «Төрээн чурттуң айыыл чок чоруунуң болгаш камгалалының үндезиннери» кылдыр өскерткенин демдеглезе чогуур. Ынчангаш республиканың 170 башкызы мергежил бедидер курстарны эрткен. Ол ышкаш тускай шериг операциязының хоочуннары өөредилгени эртип, школаларда шериг-патриотчу клубтарга башкылаар арганы алган.