Октябрь 15-те, 20 кижиден тургустунган команда шериг албанынче аъттаныпкан. Күскү кыйгыртылга-биле Тывадан 650 ажыг оол шериг албанынче чорууру планнаттынган. Шериг албанының хуусаазы 12 ай кылдыр өскерилбейн хевээр арткан.
Шериг албанынче кыйгырткан оолдар чүгле Россия Федерациязының иштинге шеригни эрттирер болгаш, чаа девискээрлерге тускай шериг операциязының даалгаларын күүседиринге киришпес деп, республиканың шериг комиссариады дыңнаткан.
«Кыйгыртылга-биле албан шериин эрттирген оолдар хуусаазы төне бээрге, чурттап турар черлеринче үе шаанда дедир чанар» - деп, Тыва Республиканың шериг комиссары подполковник Евгений Терехов дыңнаткан.
Күскү шериг кыйгыртылга кампаниязының үезинде «Чаңгыс аай шериг реестри» күрүнениң информастыг системазының курлавырларын ажыглаарын шериг комиссариады дыңнаткан. Бир эвес системада четчир медээлер бар болза, кыйгыртылга комиссиялары шеригже кыйгырткан кижиниң боду чокта, чамдык чылдагааннарга дяангаш, шериг албанын соңгаарладып болур.
Электроннуг база саазын кыйгырыгларны ажыглап, хамаатыларга дыңнадыр. Бир эвес шериг албанынче кыйгырткан кижи кыйгыртылганы алганындан бээр 20 календарьлыг хонук дургузунда чөптүг чылдагаан чокка келбейн баар болза, «Шериг хүлээлге болгаш шериг албанының дугайында» федералдыг хоойлуга дүүштүр, ол хамаатының келирин хандырары-биле түр када кызыгаарлаашкын хемчеглерин онаап болур.
Күрүне болгаш муниципалдыг ачы-дуза порталында хамаатының хууда кабинединче электроннуг кыйгыртылгаларны чорутканының, ол ышкаш түр када кызыгаарлаашкын хемчеглерин ажыглаарының база күш чок болдурганының дугайында дыңнадыгларны чорудар.
Күскү шериг кыйгыртылгазының кол онзагайы болза, бо чылын шериг албанынче кыйгыртыр дугайында шиитпир бир чыл дургузунда хоойлу езугаар күштүг болуп артар. Ол дээрге, шериг албанынче кыйгырткан хамааты бо чылын шериг албанынче кандыг-бир чылдагаан-биле чорбаан болза, дараазында шериг кыйгыртылгазы-биле ону катап кыйгыртыр.
Октябрь 1-ден эгелээн 2025 чылдың күскү шериг кыйгыртылгазының кампаниязы декабрь 31-ге чедир уламчылаар.