Тываның Баштыңы база Тыва Республиканың Чазааның кежигүннери Тываның алдарлыг эртемдени Юлия Копылованың мөчээни-биле өг-бүлезинге болгаш эш-өөрүнге ханы кажыыдалды илерейлээн.
Тываның аржаан-сугларын өөренип-шинчилээринге улуг үлүг-хуузун киирген, Томскиниң политехниктиг институдунуң лабораторлуг эргелекчизи чораан, геология-минералогия эртемнериниң кандидады Юлия Григорьевна Копылова үр үеде аарааш, октябрь 11-де чырык ортемчейден чарлып чоруткан.
Юлия Григорьевна тыва эртемденнерниң шинчилел ажылынга бодунуң күзели-биле киржип, экспедицияларны организастаарынга дузалажып, аржааннарның эм шынарларының дугайында эртем ажылдарын чорударынга киржип турган. Ол Тываның аржааннарының дугайында элээн каш монографияларны эртемденнер-биле кады бижээн.
Республиканың эрге-чагыргазы тыва эртемге Юлия Григорьевнаның киирген үлүг-хуузун чаңгыс эвес катап демдеглээн. 2024 чылда Тываның алдарлыг эртемдени деп атты аңаа тывыскан.
Тываның Баштыңы, республиканың чазааның кежигүннери Ю.Г. Копылованың дугайында чылыг сактыышкыннарга каттышкан.