Тывада тускай шериг операциязының киржикчилеринге гуманитарлыг дузаны чыыр күскү кампания уламчылап турар. «Тиилелге дээш шупту чүве» бүгү-российжи акцияны Бүгү-россияның Улусчу фронтузунуң регионалдыг күүсекчи комитеди республика чазааның деткимчези-биле организастап турар.
«Маадырга чылыг» деп ачы-буян акциязының кол сорулгазы – кыш бүдүүзүнде чылыг идик-хеп белеткелинче онза кичээнгейни углаары болур. Акцияның киржикчилери – республиканың өөредилге черлери база «Чаштар навигаторлары» төлевилел командазы бо чылын боттарының ачы-дузазының хевирин өскертир деп шиитпирлээннер. Чылыг хеп орнунга бензин инверторлуг генераторлар садарынга акшаны чыып турар. Улусчу фронтунуң дыңнатканы-биле алырга, «Чаштар навигаторлары» ам безин 11 генераторларны дамчыткан. Таңды кожууннуң Дүрген болгаш Сосновка суурларның школа төлээлери кымны мурнай дериг-херекселдерни хүлээткен. Уруглар дайынчыларга чагаалар болгаш база Дүрген хемден аас-кежиктиң даштарын хаптааш, тускай йөрээлдиг камгалалдарны бергеннер. Бо чоокку үеде республиканың шупту школалары «Маадырга чылыг» акцияга каттыжарлар.
2007 чылдан бээр Тывага чурттап, ажылдап чоруур Кыдаттың хамаатызы Чэнь Кай – күскү чыылданың киржикчилериниң бирээзи. Ол республиканың чурттакчыларын чаңгыс чер-чурттугларым дээр болгаш, бодунуң акша-хөреңгизи-биле садып алган ийи даг мотоциклин фронтуже дамчыткан. Мурнуку шугумга дайынчы даалгаларны күүседиринге чиик болгаш эптиг мотоциклдер ажыктыг. Тывада Улусчу фронтунуң күүском удуртукчузу Сайма Далчин октябрь төнчүзүнде Донецк уунга техника чеде бээрин дыңнаткан.
Кызылдың сайгарлыкчылары кайы-даа үеде акцияга идепкейлиг киржип турарлар. «Строймаркет» садыгның ээлери мотоциклди, дизельдиг генераторну, бензохирээни бергеннер. «Деловая Россия» бизнес-ниитилели генераторну болгаш бензохирээни, а гуманитарлыг чыыштарның доктаамал киржикчизи «Штиль» садыы бензохирээлерни болгаш аңаа херек чүүлдерни дамчыткан. Хамааты камгалал болгаш онза байдалдар албанының коллективи бирги дузаның аптечкаларын берген.
Бүгү республиканың волонтерлары дайынчыларның хереглелдерин шыдаар шаа-биле хандырар дээш, үргүлчү ажылдап турар. Таңды кожууннуң Арыг-Бажы биле Дүргенден, Улуг-Хем кожууннуң Хайыракан, Эйлиг-Хем, Арыг-Бажы суурлардан, Чеди-Хөл кожууннуң Элегестен, Кызыл хоорайдан чаштынар четкилери болгаш өске-даа чүүлдерни чыылда пунктуларынга чедирген.
Владимировка суурда «Чүректиң кыйгызы-биле» волонтёрлар төвүнден Жанна Чамбал ус-шевер эштери-биле сөөлгү ийи чылда 112 камуфляж четкизин кылган. Бо удаада олар 3х6 метр хемчээлдиг алды четкини болгаш бензин генераторун эккелгеннер.
Күскү чыылда октябрь 22-ге чедир уламчылаар, а гуманитарлыг ачы-дузалыг чүък машиналары октябрь 24-25 хүннеринде ТШО зоназынче үнүптер.
Тиилелгени чоокшуладыр дээн ниити ачы-дуза кампаниязынга кижи бүрүзү үлүг-хуузун киирип болур. Кызыл хоорайның Эки турачылар кудумчузунда, 3 дугаар бажыңда, Бүгү-российжи Улусчу фронтунуң регионалдыг күүсекчи комитединде база Ленин кудумчузунда 5 дугаарлыг бажыңда, ТывКУ-нуң штаб-квартиразында чыылда пунктулары ажылдап турар. Харылзажыр дугаары: 8 (39422) 2-10-50, 2-11-50.