Тываның Баштыңы Кызылда «Түбтен Шедруб Линг» хүрээзиниң чанынга тудар келир үениң аалчылар бажыңының таваан эгелээринге стартты берген. Россияда гостиница рыногунуң оператору – чурттуң 26 хоорайларын хаара туткан Cosmos Hotel Group четки төлевилелди тудуп, инвесторлаар. 2024 чылда Санкт-Петербургтуң делегей чергелиг экономиктиг форумунуң үезинде Тываның Баштыңы Владислав Ховалыг биле Cosmos Hotel Group-туң президентизи Александр Бибаның атты салган төлевилелин боттандырар дугуржулга езугаар, тудуг ажылдары эгелээн.
«Тываже кээп турар туристерниң болгаш аалчыларның саны көвүдеп, бистиң республикаже сонуургал улгаткан. Россияда эң улуг буддийжи хүрээни, чуртта эң улуг Будданың тураскаалын, «Азия төвү» скульптура комплекизин, музейивисте скифтер алдынындан кайгамчык экспонаттарны болгаш өске-даа чараш чүүлдерни көөр дээш, дыка хөй кижилер кээп турар. Келир чылын сарыг шажынның IV делегей форуму бүгү чурттан болгаш даштыкыдан аалчыларны хаара тудары чадапчок. Аалчыларны бедик деңнелге хүлээп алыр дизе, амгы үениң гостиница комплекстери болгаш шынарлыг инфраструктура херек» - деп, Владислав Ховалыг бодунуң блогунда тудугнуң эгелээнин дыңнаткан.
«Туризм адырында, ол ышкаш ооң инфраструктуразын хандырган төлевилелдерни деткиири» программаның хемчеглерин боттандырары-биле, Күрүнениң саң-хөө деткимчезин бээр хемчеглер порталынга 2025 чылдың март 31-ден апрель 30-ге чедир эрткен конкурстуг шилилге езугаар, Кызылда Cosmos Smart гостицина төлевилелин тудар төлевилел шилип алдынган. Тыва Республиканың Күрүнениң туризм комитеди төлевилелди 2025-2030 чылдарда Тыва Республиканың социал-экономиктиг хөгжүлдезиниң бот-тускайлаң программазының хемчеглерин күрүне-хуу кады эштежилгеге даянып, ооң хөй кезиин хуу инвестиция киирилдези-биле боттандырар дээш, саналдап киирген.
«Cosmos Smart» брендилиг, үш сылдыстыг аалчылар бажыңын Кызылдың мурнуу талазында, «Түбтен Шедруб Линг» деп сарыг шажын хүрээзиниң чанынга тудар. Ону шажын-чүдүлге объектизин долгандыр, хүрээ-биле дөмейлешкек чаңгыс аян-хевирге кылыр болгаш комплекстиг тудугнуң бир кезээ апаар.
Тываның Баштыңы үш сылдыстыг аалчылар бажыңының комплекизи Кызылдың база бир каасталгазы апаар дээрзинге бүзүрелин илереткен. Владислав Ховалыгның бодалы-биле алырга, төлевилел чаа ажылчын олуттарны тургузуп, республиканың турисчи күчү-шыдалын болгаш аалчылар хүлээп алыр индустриязын моон-даа соңгаар хөгжүдеринге үндезин болур.