Октябрьда республиканың муниципалдыг тургузугларынга «Студентилерниң айыыл чок чоруу: шупту корум-чурум үрээшкинеринге удур» деп профилактиктиг хемчегни эрттирип, ортумак болгаш дээди өөредилге черлериниң студентилер-биле профилактиктиг лекциялар, акциялар, квест-оюннарлыг ужуражылгаларны эрттирип, назы четпээннерге хоойлуга удур арага сатканын, аныяк өскенниң орук дүрүмнерин хажытканын дээш, оон-даа өске чурум үүлгедиишкиннерин тодарадыр дээн рейдилерни күштелдирген. Студентилерниң хоойлу-чурумга удур үүлгедиглерин болдурбас база ооң уржуктарын таныштырар сорулга-биле хемчеглерни эрттирип турар. Тыва Республиканың Чазааның Даргазының оралакчызының хүлээлгезин күүседип турар Айдыс Сынааның айтыышкыны-биле бо ажыл октябрь ортанга чедир уламчылаар.
Өөредилге чылы эгелээнден бээр республикада назы четпээннерниң, ооң иштинде техникумнар болгаш колледжтер сургуулдарының талазындан кем-херек үүлгедиишкиннери көвүдээн. Назы четпээннерниң кем-херек үүлгедиишкиннерин чавырылдырар дээш, шупту профилактика албан черлериниң киржилгези-биле сургуулдар ортузунга өөредиглиг болгаш контроль-хайгааралдыг хемчеглерни чорудар шиитпир хүлээп алдынган.
Хоорай болгаш суму чагыргаларының төлээлери биле полиция ажылдакчылары «Студентилерниң айыыл чок чоруу» профилактика хемчеглери-биле, хоойлуга удур арага аймаан садып-саарып турарын илереткен рейдилерни садыгларга чорудары планнаттынган. Ылаңгыя Кызылга ындыг рейдилиг үнүүшкүннер назы четпээннерге чаңгыс эвес удаа пиво продукциязын садып турган бир садыг ээзин илередип, кеземче харыысалгазын онааган.
Тыва Республиканың ИХЯ ОШААЧКИ инспекторларының киржилгези-биле муниципалдыг тургузугларга элээдилерниң орук шимчээшкининиң дүрүмнерин хажыдып, машина азы мотоциклди чөпшээрел чокка башкарып турган таварылгаларны илередири-биле рейдилер чоруп турар.
Регионалдыг айыыл чок чорук департаментизи, Тыва Республиканың ИХЯ ажылдакчылары база «Сайзырал» республиканың психолог-эмчи-социал үделге төвүнүң психолог башкылары «Хоойлу камгалалында аныяктар: амыдыралдың кадык овур-хевириниң эрге-хоойлу үндезиннери болгаш хоойлу хажыдыышкыннарның салдары» деп темага студентилер-биле ужуражылгаларны эрттирип турар. Октябрь 8-те Аныяктар ордузунга эрткен ындыг ужуражылгага, «Сайзырал» төвүнүң психологтары, шагдаа ажылдакчылары, Өөредилге яамызының база Юстиция яамыларының специалистери оолдар, уругларга тайылбырны берген.
Муниципалдыг тургузугларда эки турачы улусчу дружина кежигүннери болгаш ада-иелер патрульдары полиция ажылдакчылары-биле кады кышкы үеде 21 шактан эгелээр «комендант шагын» элээдилерниң сагып турарынга рейдилерни күштелдергенин сагындыраал.
Хемчеглер планы-биле «Кандыг чурттап чор сен, студент?» акцияны өөредилге черлериниң ниити чуртталга бажыңнарынга эрттирер. Аныяктарның корум-чурумунга хамаарыштыр «Хоойлужудулга ажылдап турар» деп квест-оюнну, араганың болгаш наркотиктиг бүдүмелдерниң хоразының дугайында лекциялар планнаттынган.
Хемчеглер төне бээрге, ол бүгү ажылдың үре-түңнелдеринге анализти кылыр. Бир эвес көргүзүглер эки боор болза, «Студентилерниң айыыл чок чоруу» деп арга-дуржулганы уламчылаар.