Тываның Чазаа республиканың арга-арыг девискээрлеринде өртке удур онза чурумну күш чок болдурар дугайында шиитпирни хүлээп алган. Чазактың доктаалы-биле алырга, 2025 чылдың октябрь 9-тан эгелеп арга-арыг девискээрлеринче кирерде, тускай эрттирилге азы чөпшээрел документилер херек чок апаар.
Ындыг болзажок, 2025 чылдың октябрь 15-ке чедир, өрт айыылының сезону уламчылап турары-биле, чурттакчылар болгаш организациялар арга-арыг өрттерин болдурбазы-биле серемчилел хемчеглерин сагыыры албан.
2025 чылдың өрт айыылының сезону эгелээнден бээр бүгү республикага 18355,88 га ниити шөлдүг 179 арга-арыг өрттери демдеглеттинген. Оларның 176-зы арга-арыг фондузунуң черлеринге, а 3 өрт онза камгаладыг бойдус девискээрлеринге бүрүткеттинген. Регионалдыг Арга-арыг болгаш бойдус яамызының дыңнатканы-биле алырга, бо чылын чаңнык дүшкенинден 119 арга-арыг өрттери өөскээн. Эң улуг когаралды чедирген 38 арга-арыг өрттери кижилерниң буруузу-биле болган.
2025 чылдың октябрь 9-туң эртенги шагында, Тыва Республиканың арга-арыг фондузунуң черлеринде өрттер демдеглеттинмээн. Тываның Арга-арыг яамызының курлавырында 274 кижи база 129 санныг техника өрт үнзе, дүрген хөделиринге белен.
Кижилерниң өртке удур айыыл чок чорук дүрүмнерин сагыырындан арга-арыг экосистемазының экологтуг өйлээшкинин болгаш турум чоруун арттырары хамааржыр дээрзин, Тываның Арга-арыг яамызы сагындырган. Кадып каан үнүштер болгаш сырый ыяштар чоогунга ажык от ужутпас болза эки. Одагны бүрүнү-биле өжүрер, кывыычал чүүлдерни, чижээ, өшпээн сереңги, таакпы артынчызын октап болбас.