2025 чылдың октябрь 9-тан 10-га чедир, Тываның найысылалы Кызыл хоорайга, «Аян-чорук» деп республиканың туризм талазы-биле 2-ги форум болуп эртер. Ону Тыва Республиканың Турисчи информация төвү организастап эрттирер. Форум күрүне эрге-чагырга органнарының төлээлериниң, туризм адырында бизнес-ниитилежилгениң болгаш эксперт ниитилелиниң аразында боттуг чугаа чорударының кол шөлү апаар.
Регионда туризм адырының херек кырында ажыл-чорудулгазынче база чидиг айтырыгларын шиитпирлээринче кол кичээнгейни угландырар. Форумнуң ажыл-агыйжы программазы республикага туризмни хөгжүдериниң дүүштүрүлге чөвүлелиниң хуралын бир дугаар эрттирип, аңаа регионга туризм хөгжүлдезиниң кол айтырыгларын болгаш перспективаларын сайгарар.
«Тываны ажыдыңар» деп мобильдиг капсырылганы чогаадып кылган аныяк специалист Амир Ооржак форумга ол ажылын таныштырар. Капсырылга Тываның кол турисчи оруктарының, дыштанылга баазаларның дугайында болгаш оон-даа хөй медээлерни киирген.
«Алаш фест»-тиң үндезилекчизи Аңгырак Ховалыг база «Чалама» КХН-ниң удуртукчузу Кара-Кыс Дас-оол туризм индустриязын хөгжүдер сорулгага улуг хемчээлдиг хемчеглерни эрттирериниң практиктиг чижектери болгаш арга-дуржулгазы-биле үлежир. «Тыва Республиканы таныштыраал» сессияда өөредилгени планнаан.
«Чугаалап тур бис. Дыңнап тур бис. Дыңнадывыс» деп стратегтиг сессия гидтиң аттестациязы, отчеттаашкыны, айыыл чок чоруу болгаш чөпшээрел алыры дээн ышкаш айтырыгларны сайгарар. Росстат, Росгвардия, Онза байдалдар яамызы, Онза камгалалдыг бойдус девискээрлериниң дирекциязы дээн ышкаш, тускай хыналда-хайгаарал органнарының төлээлери тайылбырны бээр.
Форумнуң ийи дугаар хүнүнде күрүнеден деткимче хемчеглерин чугаалажыр. Инвестиция хөгжүлдезиниң агентилелинден база Тываның сайгарлыкчы чорук деткиир фондузундан төлээлер турисчи инфраструктураны хөгжүдер болгаш бизнести деткиир талазы-биле бар аргаларны делгереңгей таныштырар.