Россияның Президентизи Владимир Путин төрүттүнген хүнүн демдеглеп турар. Тываның Баштыңы Владислав Ховалыг регионнуң чурттакчыларының өмүнээзинден күрүне баштыңынга төрүттүнген хүнү-биле байыр чедиргеш, республиканың хөгжүлдезиниң чугула айтырыгларын шиитпирлээринге күжениишкиннерин база Тываның чечектелиишкининге хууда үлүг-хуузун кииргени дээш өөрүп четтиргенин илереткен.
«Тываның чурттакчылары бистиң регионнуң хөгжүлдезинге Президентиниң доктаамал кичээнгейин ханы хүндүткел болгаш өөрүп четтириишкин-биле демдеглеп турар. Владимир Владимировичиниң республикага чоокта чаа аалдап келгени чурттакчы чонга, ылаңгыя аныяктарга чырык сактыышкынны арттырып, сорулгаларын чедип алырынга күштүг идигни берген» - деп, Тываның Баштыңы бодунуң блогунда байыр чедириишкининде демдеглээн.
Регионда Президентиниң деткимчези-биле хөй-ле төлевилелдер боттанып, кижилерниң амыдырал-чуртталгазының шынары элээн экижээн деп, Владислав Ховалыг айтыкан. Владимир Путинниң 2025 чылдың эгезинде киирген национал төлевилелдер боттанылгазы-биле чүгле бо чылын республикада 80 ажыг социал объектилер: школалар, фельдшер-акушер пунктулар, төп кожуун эмнелгелери, библиотекалар, культура бажыңнары туттунуп, үндезини-биле септеттинип, орук участоктары эде чаартынып, хөй-ниити девискээрлери чаагайжыттынган.
Президентиниң деткимчези-биле 2023 чылда республиканың төөгүзүнде бир дугаар 11 школага тудуг ажылдары деңге эгелээн, оларның алдызы бо өөредилге чылында ажыттынган. Муң-муң оолдар, уруглар амгы үениң чаагайжыттынган байдалдарында эртем-билигни алыр аргалыг апарган.
Эрткен чылдың күзүнде Президентиниң республикага келгениниң соонда, регион чүгле Тыва Республиканың чурттакчыларынга саналдааны чылда 2 хуусаалыг чиигелделиг өг-бүлениң ипотека программазын катап тургускан. 6 хар четпээн уруглуг өг-бүлелер, 18 хар четпээн ийи азы оон хөй ажы-төлдүг өг-бүлелер база инвалид уруглуг 800 ажыг өг-бүлелер ипотека чээлизиниң бо продуктузун ажыглап турар.
Тываның Баштыңы республика чурттакчыларының өмүнээзинден Президентиге быжыг кадыкшылды, сыныш чок хей-аътты, Россияның чаагай чоруу дээш чаа-чаа чедиишкиннерни күзээн.