Октябрь 8-тен 12 хүннеринде, Кызыл хоорайда Советтиг Тываның 5 чылы аттыг стадионга Тыва Республиканың Баштыңының кубогу дээш 18 харга чедир аныяктар ортузунга футбол маргылдаазы эгелээр. Тыва Республиканың чыынды командаларының спортчу белеткел төвү болгаш регионалдыг футбол федерациязы ону организастап эрттирер.
Регионалдыг Спорт яамызының дыңнатканы болза, республиканың шупту кожууннарындан командалар Кубок дээш ойнаарлар. Команданың ойнакчылары Россияның футбол эвилелиниң чурагайлыг шөлүнге хууда кижи кылдыр бүрүткедир ужурлуг. Бүрүткетпээн киржикчилер маргылдаага киирбес.
Бөгүн «Субедей» спорт школазынга эртер кол судья коллегиязынга командаларның удуртукчулары ойнакчыларның документилерин база ойнаар чагыын киирерлер. Хурал соонда маргылдаага чеже командалар киржири билдинер.
Шаңналдыг черлер алган командаларга кубоктарны болгаш дипломнарны тыпсыр. Командаларның тренерлери болгаш ойнакчылары медальдарны, хүндүлел бижиктерни болгаш акша шаңналдарын алыр. Үш аңгы номинацияга: тулган дээн вратарьга, 3 ойнакчыга база халдакчыга шаңналдарны тыпсыр.