Россия Федерациязының чырыдыышкын ажылының тергиини, Тыва Республиканың өөредилгезиниң алдарлыг ажылдакчызы Светлана Ощепкова республиканың Националдар херектериниң талазы-биле агентилелдиң директору албан хүлээлгени күүседир кылдыр томуйлаттынган. Ол чаа албан-дужаалга регионда чоннар аразында харылзааларны болгаш шажын чүдүлгелер аразында эп-найыралды быжыглаарынче, хөй талалыг этнокультураны сайзырадырынче угланган айтырыглар-биле ажылдаар.
Светлана Михайловна Ощепкова Кызылга төрүттүнген. 1986 чылда Кызылдың күрүнениң педагогика институдун дооскаш, Кызылдың 8 дугаар школазынга математика башкызы, класстан дашкаар кижизидилге ажылдарының организакчызы, өөредилге талазы-биле директорнуң оралакчызы бооп, 10 чыл ажыг ажылдаан. 1999 чылда Кызылдың 15 дугаар лицейинге директорнуң кижизидилге ажылының талазы-биле оралакчызынга томуйлаткан. Совет Эвилелиниң Маадыры Н.Н. Макаренко аттыг 15 дугаар лицейниң директорунга 2002 чылдан эгелеп ажылдаан. 2014 чылда республиканың өөредилге сайыдының бирги оралакчызынга томуйлаткан. Ол 2020 чылдан бээр Тываның Баштыңының Администрациязынга база Тыва Республиканың Чазааның Аппарадынга ажылдаан. 2023 чылдан амгы үеге чедир – Тыва Республиканың Хөй-ниити палатазының аппарат удуртукчузу.
Националдар херектериниң талазы-биле агентилел күрүнениң национал политиказында адырлар аразында айтырыгларны дүүштүрүп, чурумчудар бүрүн эргени чорудуп турар. Агентилел чоннар аразының харылзааларында стратегияларны, концепцияларны болгаш программаларны ажылдап кылгаш, боттандырар, национал-культурлуг автономиялар болгаш шажын организациялары-биле кады ажылдаар, республика девискээринде үндезин, эвээш санныг чоннарга болгаш орус казактарга хамаарыштыр күрүне политиказының адырында хемчеглерни боттандырар. Тыва Республиканың Чазааның доктаалы-биле бо чылдың май айдан эгелеп ведомство даштыкы хамаатыларның социал болгаш культурлуг белеткел болгаш каттыжыышкын талазы-биле ажылдарны чорудуп турар.
Агентилелдиң бо чоокку планнарында, тожу тываларының чурттап турар черлеринде социал объектилерниң материал-техниктиг баазазын экижидер хемчеглерни боттандырып, Чоннуң чаңгыс деминиң хүнүн демдеглеп эрттиреринге белеткелдер кирген. Ол ышкаш чыл төнчүзүнге чедир республикага, Тыва Республикада Россия Федерациязының Соңгу чүк, Сибирь болгаш Ыраккы Чөөн чүк үндезин чоннарының экономиктиг болгаш социал хөгжүлдезин деткииринче угланган хемчеглерниң шынарынга таарзынганының деңнелин тодарадыр дээш, өске-даа социологтуг шинчилелдерни организастап чорудар.