Дыштаныр хүннерде регионга хар чагганы-биле Тываның орук албан черлери ажылын күштелдирген. Чамдык кожууннарда чагган хар орук шимчээшкинин бергедеткен. Орукчулар кончуг дүрген хөделип, арт кырының берге участоктарын аштаан.
Тываның Баштыңы Владислав Ховалыг республиканың Орук-транспорт яамызынга байдалды онза кичээнгейге тудар даалганы берген. Ол ышкаш орук шимчээшкининиң киржикчилери – чолаачыларга кыйгырыгны кылган. «Орук чоруур деп турар шупту чолаачылар, агаар-бойдус талазы-биле дыңнадыгны кичээнгейге алырын сагындырып тур мен. Кышкы дугуйларыңарны үе-шаанда солуп, машинаның техниктиг байдалын хынап, орук шимчээшкининиң дүрүмнерни сагып чоруңар» - деп, Тываның Баштыңы бодунуң албан езузунуң блогунда бижээн.
Россияның ОБЯ-зының Тывада эргелелиниң дыңнатканы болза, Эрзин кожуунда эрткен хонукта секундада 20 метр, Өвүр кожуунда 21 метр чедир хат хадаан. Чөөн-Хемчик кожуунга 7 мм чедир өл хар дүшкен, Чеди-Хөл, Тожу, Эрзин кожууннарга 2 мм, а Тере-Хөл кожуунга 3 мм чедир хар чагган.
Республиканың Орук-транспорт яамызының дыңнатканы-биле алырга, «Абазаның ОТСУ» КХН Абакан-Ак-Довурак автооруунда «Сотый», «Ангольский» база «Канжульский» арттөтар кырында 190 км-ден 332 дугаар км-ге чедир харны аштап, тайгакка удур элезин-сайны чаштырган.
«Сая» КХН орук чери Кызыл – Эрзин – Моол күрүне кызыгаары автооруктуң 60 км-ден 175-ке чедир участогунда база шак ындыг ажылдарны чорудуп турар. "ДСУ-17" КХН орук ажылдакчылары Хову-Аксы суурже кирер орукта болгаш «Северный» арт кырының участогунда элезин-сайны чаштырган. Сарыг-Сеп–Балгазын автооруктуң 36-гы километринде Сарыг-Септиң орук-септелге-тудуг организациязы чогуур ажылдарны чоруткан.
Бояровка–Тоора-Хем автооруктуң 27-49-ку километр участогунда хууда сайгарлыкчы В.Л. Юрковтуң ажылчыннары харны аштап, элезин-сайны чаштырган.
Арткан оруктарда байдал чогумчалыг дээрзин Орук транспорт яамызы дыңнаткан.
Бөгүнде шупту 16 орук организацияларының 14-ү автооруктар ажаалдазында хаара туттунган, оларда 33 техника аймаа, ооң санында 7 автогрейдер, 2 МТЗ, 3 КамАЗ, 2 экскаватор болгаш өске-даа тускай орук машиналары бар.
Орук транспорт яамызы ырак орук чоруур чолаачыларга сүмелерни бодунуң сайтызында берген. Машиназын ыяк хынап, тормозтары, сайылганнары болгаш аккумляторунче онза кичээнгейни салырын специалистер сагындырган. "Кичээнгейлиг болгаш серемчилелдиг чорууңардан орук шимчээшкининде силерниң-даа, өске-даа кижилерниң айыыл чок чоруу хамааржыр" - деп, орук ажылдакчылары сагындырган.